ព័ត៌មានអន្ដរជាតិ

ចិននិងប៉ាគីស្ថាន ជំរុញឱ្យអាមេរិក និងអ៊ីរ៉ង់ បញ្ឈប់ការបាញ់គ្នាបន្ទាន់ ងាកទៅចរចាសន្តិភាពវិញ

បានផុស

២៣ វិនាទី មុន

នៅ

ថ្ងៃសុក្រ ១៧ កក្កដា ២០២៦

ដោយ

សេចក្តីថ្លែងការណ៍មួយពីទីក្រុងប៉េកាំងនៅថ្ងៃសុក្រ បានឱ្យដឹងថា រដ្ឋមន្ត្រីការបរទេសចិននិងប៉ាគីស្ថានអំពាវនាវឱ្យសហរដ្ឋអាមេរិក និងអ៊ីរ៉ង់បញ្ឈប់អរិភាពជាបន្ទាន់ ហើយបន្តការសន្ទនាឡើងវិញ។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Anadolu នៅថ្ងៃទី១៧ ខែកក្កដា ឆ្នាំ២០២៦ ។

ការអំពាវនាវរបស់ប្រទេសទាំងពីរកើតឡើង អំឡុងពេលកិច្ចប្រជុំរវាងរដ្ឋមន្ត្រីការបរទេសចិន លោក វ៉ាង យី និងសមភាគីប៉ាគីស្ថាន លោក Ishaq Dar នៅទីក្រុងសៀងហៃកាលពីថ្ងៃពុធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍រៀបរាប់ថា លោក វ៉ាង និង លោក Ishaq Dar បានសម្តែងការព្រួយបារម្ភអំពីការធ្លាក់ចុះនៃស្ថានភាពបច្ចុប្បន្ននៅមជ្ឈិមបូព៌ា ហើយអំពាវនាវឱ្យភាគីពាក់ព័ន្ធបញ្ឈប់អរិភាពជាបន្ទាន់ ដើម្បីខិតខំជំនះការលំបាក លុបបំបាត់ការជ្រៀតជ្រែក ចាប់ផ្តើមទំនាក់ទំនងឡើងវិញ ជាពិសេសបន្តការសន្ទនា ក្នុងការសម្រេចបាននូវកិច្ចព្រមព្រៀងសន្តិភាពដ៏ទូលំទូលាយតាមរយៈការចរចា។

អ្នកទាំងពីរបន្ថែមថា សហគមន៍អន្តរជាតិក៏គួរតែបន្តផ្តល់ជំនួយក្នុងលើបញ្ហានេះផងដែរ។ ដោយសរសើរតួនាទីនៃការសម្របសម្រួលរបស់ប៉ាគីស្ថាន លោក វ៉ាង សង្កត់ធ្ងន់ថា ដំណាក់កាលទីមួយនៃអនុស្សរណៈយោគយល់គ្នារវាងសហរដ្ឋអាមេរិក និងអ៊ីរ៉ង់ គឺទទួលបានមកដោយលំបាក។

លោកមានប្រសាសន៍ថា៖ « បទប្បញ្ញត្តិស្នូលនៃអនុស្សរណៈមិនត្រឹមតែអនុលោមតាមផលប្រយោជន៍ជាមូលដ្ឋាន និងរយៈពេលវែងរបស់ភាគីពាក់ព័ន្ធប៉ុណ្ណោះទេ ថែមទាំងបំពេញតាមការរំពឹងទុករួមរបស់សហគមន៍អន្តរជាតិផងដែរ»។

លោក វ៉ាង ព្រមានថា៖ « សន្តិភាពគឺស្ថិតនៅក្នុងដៃហើយ។ ឥឡូវនេះយើងមិនអាចមើលរំលងវាបានទេ! កុំទុកឱ្យរអិលទៅឆ្ងាយឱ្យសោះ។ គ្រប់ភាគីទាំងអស់ គួរតែបំពេញការប្តេជ្ញាចិត្តនិងគោរពតាមបទប្បញ្ញត្តិនៃអនុស្សរណៈយោគយល់គ្នារបស់អ៊ីស្លាម៉ាបាដ»។

លោកបន្ថែមថា៖ « ដូចសព្វមួយដង ប្រទេសចិននឹងគាំទ្រកិច្ចខិតខំប្រឹងប្រែងសម្របសម្រួលរបស់ប៉ាគីស្ថាន ហើយនឹងបន្តដើរតួនាទីស្ថាបនាក្នុងការលើកកម្ពស់ បន្ធូរបន្ថយភាពតានតឹងតាមរបៀបដែលអាចធ្វើបាន»។

សេចក្តីថ្លែងការណ៍បានធ្វើឡើង ខណៈសហរដ្ឋអាមេរិក និងអ៊ីរ៉ង់បន្តផ្លាស់ប្តូរការវាយប្រហារយោធាសងសឹករយៈពេល ៦ថ្ងៃ ចំពេលមានភាពតានតឹងលើច្រកសមុទ្រ Hormuz ជាថ្មី៕

សម្រួល៖ ណឺ មិនា