ព័ត៌មានអន្ដរជាតិ

សភាអាមេរិក អនុម័តកញ្ចប់ថវិកាបម្រុង ៩៥ប៊ីលានដុល្លារ សម្រាប់ដោះស្រាយផលប៉ះពាល់នានាក្នុងសង្រ្គាមជាមួយអ៊ីរ៉ង់

បានផុស

៣០ វិនាទី មុន

នៅ

ថ្ងៃព្រហស្បតិ៍ ២៣ កក្កដា ២០២៦

ដោយ

សភាតំណាងរាស្ត្រសហរដ្ឋអាមេរិក បានអនុម័តក្របខ័ណ្ឌថវិកាចំនួន ៩៥ប៊ីលានដុល្លារអាមេរិក នៅថ្ងៃទី២២ ខែកក្កដា ដោយថវិកាភាគច្រើនត្រូវបានបម្រុងទុកសម្រាប់ក្រសួងការពារជាតិអាមេរិក ដើម្បីផ្តល់មូលនិធិដល់សង្គ្រាមប្រឆាំងនឹងអ៊ីរ៉ង់។

ទីភ្នាក់ងារសារព័ត៌មាន AFP ផ្សាយនៅថ្ងៃទី២៣ ខែកក្កដា ឆ្នាំ ២០២៦ បានឱ្យដឹងថា វិធានការនេះត្រូវបានអនុម័តដោយសំឡេងប្រកៀកប្រកិតគ្នានៅក្នុងការបោះឆ្នោត ដោយមានសំឡេងចំនួន ២១៦ ទល់នឹង ២១៤ ហើយលទ្ធផលនេះកំពុងឆ្ពោះទៅកាន់ព្រឹទ្ធសភា ជាកន្លែងមួយសម្រាប់ជោគវាសនានៃសន្លឹកឆ្នោត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផែនការផ្តល់ថវិកាចំនួន ៧៣ប៊ីលានដុល្លារអាមេរិកសម្រាប់កងកម្លាំងប្រដាប់អាវុធ និងទីភ្នាក់ងារចារកម្ម ជាពិសេសដើម្បីផ្តល់មូលនិធិដល់ប្រតិបត្តិការដែលទាក់ទងនឹងសង្គ្រាមប្រឆាំងនឹងអ៊ីរ៉ង់ ក៏ដូចជាជំនួយចំនួន ១២ប៊ីលានដុល្លារអាមេរិកសម្រាប់កសិករដែលរងផលប៉ះពាល់ដោយសង្គ្រាមពាណិជ្ជកម្មរបស់ប្រធានាធិបតីអាមេរិក លោក ដូណាល់ ត្រាំ ។

ថវិកាបន្ថែមចំនួន ១០ប៊ីលានដុល្លារអាមេរិកនឹងត្រូវប្រើប្រាស់សម្រាប់កម្មវិធីទាក់ទងនឹងការបោះឆ្នោត ជាការជំរុញរបស់ លោក ត្រាំ ក្នុងការអនុម័តនៃការរឹតបន្តឹងការបោះឆ្នោតទូទាំងប្រទេសថ្មី ខណៈប្រជាប្រិយភាពរបស់លោក ហាក់មានភាពមិនល្អប្រសើរ។

នាពេលនេះ សេចក្តីសម្រេចគ្រាន់តែជាក្របខ័ណ្ឌថវិកាប៉ុណ្ណោះ ហើយវានឹងអនុញ្ញាតឱ្យសមាជិកសភាសាធារណរដ្ឋ ប្រសិនបើត្រូវបានអនុម័តដោយព្រឹទ្ធសភា ព្រាងច្បាប់លម្អិតពេលក្រោយនៅរដូវក្តៅ។

ទន្ទឹមនឹងនេះ តំណាងរាស្រ្តបក្សប្រជាធិបតេយ្យ លោកស្រី Rosa DeLauro បានថ្កោលទោសវិធានការមួយ ដែលនឹងអនុញ្ញាតឱ្យ លោក ត្រាំ ផ្តល់ហិរញ្ញប្បទានដល់ការបន្តសង្គ្រាមរបស់ខ្លួនប្រឆាំងនឹងអ៊ីរ៉ង់។

លោកស្រីនិយាយថា៖ « ប្រជាជនអាមេរិកមិនចង់បានសង្គ្រាមបើកចំហ គ្មានគោលដៅ ថ្លៃ និងសាហាវបន្ថែមទៀតនៅមជ្ឈិមបូព៌ាទេ។ ពួកគេចង់ឱ្យតម្លៃនៃតម្រូវការជាមូលដ្ឋានដូចជា អាហារ លំនៅដ្ឋាន ការថែទាំសុខភាព ការថែទាំកុមារ និងប្រេងសាំងធ្លាក់ចុះ»។

គួរបញ្ជាក់ថា ថ្លៃដើមនៃការរស់នៅក្នុងសហរដ្ឋអាមេរិកគឺជាបញ្ហាស្នូលមួយនៅក្នុងដំណើរការបោះឆ្នោតពាក់កណ្តាលអាណត្តិ ដោយសារអតិផរណានៅតែបន្តកើតមាន៕

ណឺ មិនា