ព័ត៌មានជាតិ

លោក ជិន ម៉ាលីន ៖ វាជារឿងធម្មតាដែលទូតមុខដដែលៗ បង្ហាញក្តីកង្វល់លើសំណុំរឿងសកម្មជនប្រឆាំងដដែលៗ

បានផុស

៥ years មុន

នៅ

ថ្ងៃចន្ទ ១០ ឧសភា ២០២១

ដោយ

ភ្នំពេញ ៖ លោក ជិន ម៉ាលីន អនុប្រធាន និងជាអ្នកនាំពាក្យគណៈកម្មាធិការសិទ្ធិមនុស្សកម្ពុជាបានថ្លែងថា វាជារឿងធម្មតាទេ ដែលទូតមុខដដែលៗ ហើយបង្ហាញក្តីកង្វល់លើសំណុំរឿងសកម្មជនប្រឆាំងមួយចំនួនដដែលៗ ពីព្រោះសកម្មជនទាំងនោះ ជាក្រុមគោលដៅ ដែលគេការពារ និងគាំទ្រនាពេលកន្លងមក ទៅតាមនិន្នាការ និងរបៀបវារៈនយោបាយរបស់គេរៀងៗខ្លួន។

ការបញ្ជាក់របស់លោក ជិន ម៉ាលីន ជាការឆ្លើយតបសំណួររបស់អ្នកសារព័ត៌មានកាលពីថ្ងៃទី០៩ ខែឧសភា។ លោកថា “វាជារឿងធម្មតា ដែលគេបង្ហាញក្តីកង្វល់ពាក់ព័ន្ធសំណុំរឿងសកម្មជនទាំងនោះ ដែលជាក្រុមគោលដៅគេការពារ និងគាំទ្រនាពេលកន្លងមក ទៅតាមនិន្នាការ និងរបៀបវារៈនយោបាយរបស់គេរៀងៗខ្លួន។ តែប្រសិនបើពួកគេមិនខ្វល់ទៅវិញ ទើបវាជារឿងមិនធម្មតា”។

បើតាមលោក ជិន ម៉ាលីន “ទោះជាយ៉ាងណាក៏ដោយ ការបង្ហាញក្តីកង្វល់ និងរិះគន់ដល់ដំណើរការកាត់ក្តីសកម្មជនទាំងនោះ វាគ្រាន់តែជាសារនយោបាយតែប៉ុណ្ណោះ វាមិនមានទម្ងន់ផ្នែកច្បាប់ និងឥទ្ធិពលអ្វីលើការសម្រេចរបស់តុលាការនោះឡើយ។ មធ្យោបាយតាមផ្លូវច្បាប់តែមួយគត់ ដើម្បីអាចជួយ និងការពារសកម្មជនទាំងនោះបាន គឺការចូលរួមក្នុងដំណើរការនីតិវិធីតុលាការ ធ្វើការការពារខ្លួនតាមផ្លូវច្បាប់ បង្ហាញនូវសក្ខីកម្ម និងភស្តុតាងរឹងមាំ ក្នុងការដោះបន្ទុកទៅនឹងបទចោទ ជាជាងធ្វើជាមេធាវីការពារក្តីនៅក្រៅរបងតុលាការ៕

ដោយ ៖ កោះកែវ

Related Topics:លោក ជិន ម៉ាលីន