អតីតមេដឹកនាំពិភពលោករាប់រយនាក់ ជំរុញឲ្យ G7 ផ្តល់វ៉ាក់សាំងដល់ប្រទេសក្រីក្រ ប្រឆាំងកូវីដ

អតីតប្រធានាធិបតី នាយករដ្ឋមន្រ្តីនិងរដ្ឋមន្រ្តីក្រសួងការបរទេសរាប់រយនាក់ បានជំរុញឲ្យក្រុមប្រទេសអ្នកមាន (G7) ចំណាយប្រាក់ សម្រាប់ការចាក់វ៉ាក់សាំងការពារជំងឺកូវីដ-១៩ទូទាំងពិភពលោក ដើម្បីជួយបញ្ឈប់មេរោគនេះពីការវិវត្ត។

មេដឹកនាំទាំងអស់ បានអំពាវនាវបែបនេះ មុនកិច្ចប្រជុំកំពូល G7 ក្នុងប្រទេសអង់គ្លេសដែលនឹងចាប់ផ្តើមនៅថ្ងៃសុក្រ នៅពេលដែលប្រធានាធិបតីអាមេរិកលោក Joe Biden នឹងជួបជាមួយមេដឹកនាំអង់គ្លេស បារាំង អាល្លឺម៉ង់ អ៊ីតាលី កាណាដានិងជប៉ុន។

នៅក្នុងលិខិតរបស់ពួកគេទៅកាន់ G7, អតីតមេដឹកនាំពិភពលោកបាននិយាយថា កិច្ចសហប្រតិបត្តិការពិភពលោកបានបរាជ័យក្នុងឆ្នាំ២០២០ ប៉ុន្តែថា ឆ្នាំ២០២១ អាចនឹងឈានទៅរកយុគសម័យថ្មីមួយ។

លិខិតនោះបាននិយាយថា “ការគាំទ្រពី G7 និង G20 ដែលធ្វើឲ្យវ៉ាក់សាំងអាចចូលទៅដល់បណ្តាប្រទេសដែលមានប្រាក់ចំណូលទាបនិងមធ្យម គឺមិនមែនជាសកម្មភាពសប្បុរសធម៌ទេ ប៉ុន្តែផ្ទុយទៅវិញគឺសម្រាប់ផលប្រយោជន៍ជាយុទ្ធសាស្ត្ររបស់ប្រទេសនីមួយៗ”។

ក្នុងចំណោមហត្ថលេខីទាំងនោះ រួមមានអតីតនាយករដ្ឋមន្ត្រីអង់គ្លេសលោក Gordon Brown និងលោក Tony Blair, អតីតអគ្គលេខាធិការអង្គការសហប្រជាជាតិលោក Ban-Ki Moon និងអតីតមេដឹកនាំអាហ្វ្រិកចំនួន ១៥ រូប។

ពួកគេនិយាយថា មេដឹកនាំ G7 និងមេដឹកនាំដទៃទៀត ដែលត្រូវបានអញ្ជើញឲ្យចូលរួមក្នុងកិច្ចប្រជុំនេះ គួរតែធានាឲ្យបាននូវទឹកប្រាក់ប្រហែល ៣០ ពាន់លានដុល្លារអាមេរិក ក្នុងមួយឆ្នាំ រយៈពេលពីរឆ្នាំ ឆ្ពោះទៅរកការប្រយុទ្ធប្រឆាំងនឹងរោគរាតត្បាតនៅទូទាំងពិភពលោក៕

ប្រែសម្រួល៖ Vann Vann

ប្រភព៖ CNA

ចុចអាន៖ វៀតណាម រៃអង្គាសបានប្រាក់ ៣២៩ លានដុល្លារអាមេរិក យកទៅទិញវ៉ាក់សាំងកូវីដ