ឆេះមន្ទីរពេទ្យព្យាបាលកូវីដនៅ អ៊ីរ៉ាក់ ស្លាប់មនុស្ស៤១នាក់

មន្ត្រីសុខាភិបាលបាននិយាយថា មនុស្សចំនួន ៤១ នាក់បានស្លាប់ ក្នុងអគ្គិភ័យ នៅឯមន្ទីរពេទ្យព្យាបាលអ្នកជំងឺកូវីដរបស់អ៊ីរ៉ាក់ ដែលនេះជាគ្រោះអគ្គិភ័យដ៏សាហាវទី២ នៅមន្ទីរពេទ្យកូវីដរបស់អ៊ីរ៉ាក់ ក្នុងរយៈពេល៣ខែ។

អគ្គិភ័យ បានឆាបឆេះមន្ទីរពេទ្យ Al-Hussein ក្នុងទីក្រុង Nasiriya ភាគខាងត្បូង ប្រទេសអ៊ីរ៉ាក់ កាលពីយប់ថ្ងៃចន្ទ ហើយមកទល់ពេលនេះ នៅតែបន្តឆាបឆេះ។

យ៉ាងណាក្តី គេមិនទាន់ដឹងអំពីមូលហេតុនៃគ្រោះអគ្គិភ័យនេះ នៅឡើយទេ។

អ្នកនាំពាក្យអាជ្ញាធរសុខាភិបាលក្នុងតំបន់លោក Haydar al-Zamili បានប្រាប់ AFP ថា “ជនរងគ្រោះ ត្រូវស្លាប់ក្នុងអណ្តាតភ្លើង ហើយការស្វែងរកនៅតែបន្ត”។ លោកបានកត់សម្គាល់ថា មានការភ័យខ្លាចថា ជនរងគ្រោះច្រើនទៀត នៅតែកំពុងជាប់ខាងក្នុងអគារ។

ប្រភពពីមន្ត្រីសុខាភិបាលបានប្រាប់ Reuters ថា ចំនួនអ្នកស្លាប់អាចនឹងកើនឡើង ព្រោះអ្នកជំងឺជាច្រើនកំពុងបាត់ខ្លួន។ បុគ្គលិកសុខាភិបាល ២ នាក់ស្ថិតក្នុងចំណោមអ្នកស្លាប់។

រហូតមកទល់ពេលនេះ មនុស្សចំនួន១៦នាក់ ត្រូវបានជួយសង្គ្រោះ៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ រ៉ុកកែតវាយប្រហារមូលដ្ឋានយោធាកាន់កាប់ដោយអាមេរិកនៅ អ៊ីរ៉ាក់