ផ្ទុះគ្រាប់បែកក្នុងផ្សារ ស្លាប់និងរបួសមនុស្សជាង៦០នាក់នៅ អាហ្វហ្គានីស្ថាន

មនុស្សយ៉ាងតិច១៧នាក់បានស្លាប់និងជាង៥០នាក់ផ្សេងទៀតរងរបួសបន្ទាប់ពីការផ្ទុះគ្រាប់បែកពីរលើកផ្ទួនៗគ្នាបានវាយប្រហារផ្សារមួយក្នុងទីក្រុង Bamyan នៃខេត្ត Bamyan ភាគកណ្តាលប្រទេសអាហ្វហ្គានីស្ថានកាលពីថ្ងៃអង្គារ។

មន្រ្តីមន្ទីរសុខាភិបាលខេត្តម្នាក់បានប្រាប់ Xinhua ដោយមិនបញ្ចេញឈ្មោះថា “តួលេខចុងក្រោយបង្អស់បានបង្ហាញថា មនុស្សចំនួន១៧នាក់រួមទាំងមន្រ្តីប៉ូលិសចរាចរណ៍ម្នាក់ផងដែរត្រូវបានសម្លាប់និងជាង៥០នាក់រងរបួស។

ចំនួនអ្នកស្លាប់អាចកើនឡើងបន្តទៀតព្រោះមនុស្សមួយចំនួនកំពុងមានរបួសធ្ងន់។

លោក Latif Azimi អ្នកនាំពាក្យរដ្ឋាភិបាលខេត្តបានប្រាប់ Xinhua មុននេះថា ការផ្ទុះបានកើតឡើងក្នុងរយៈពេលដ៏ខ្លីនៅឯផ្សារដែលមានមនុស្សច្រើនកុះករក្នុងទីក្រុងនៅប្រហែលម៉ោង៤និង៣០នាទីរសៀល។

ប្រភពក្រៅផ្លូវការបានឲ្យដឹងថា​ កងកម្លាំងសន្តិសុខបានចាប់ខ្លួនជនសង្ស័យពីរនាក់បន្ទាប់ពីហេតុការណ៍នេះ។

រហូតមកដល់ពេលនេះ មិនទាន់មានក្រុមណាមួយប្រកាសទទួលខុសត្រូវចំពោះការវាយប្រហារនេះនៅឡើយទេ។ ក្រុមសកម្មប្រយុទ្ធតាលីបង់បានបដិសេធការពាក់ព័ន្ធរបស់ខ្លួននៅក្នុងការផ្ទុះនេះ៕

ប្រែសម្រួលដោយ៖ Vann Vann

ប្រភព៖ Xinhua