ព័ត៌មានជាតិ

អភិបាលខេត្តបន្ទាយមានជ័យ ៖ គ្មានពលរដ្ឋណាម្នាក់ អត់អាហារហូបចុកក្នុងអំឡុងពេលបិតខ្ទប់ ឬធ្វើចត្តាឡីស័កនោះឡើយ

បានផុស

៤ years មុន

នៅ

ថ្ងៃព្រហស្បតិ៍ ១២ សីហា ២០២១

ដោយ

ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានមានប្រសាសន៍ថា នឹងគ្មានបងប្អូនប្រជាពលរដ្ឋណាម្នាក់ គ្មានអាហារហូបចុក ក្នុងអំឡុងពេលបិតខ្ទប់ ឬធ្វើចត្តាឡីស័កនោះឡើយ ។

ការលើកឡើងដូច្នេះ ធ្វើឡើងកាលពីថ្ងៃទី១២ ខែសីហា ឆ្នាំ២០២១ ក្នុងពេលដែលឯកឧត្តម ដឹកនាំក្រុមការងារនាំអំណោយស្បៀងអាហារ ចែកជូនបងប្អូនប្រជាពលរដ្ឋធ្វើចត្តាឡីស័កនៅតាមផ្ទះ ចំនួន១៣១គ្រួសារ ក្នុងសង្កាត់អូរអំបិល សង្កាត់ព្រះពន្លា និងសង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្តមអភិបាលខេត្ត បានមានប្រសាសន៍ទៀតថា រដ្ឋបាលខេត្តមិនចង់ឱ្យមានការបិតខ្ទប់នោះទេ ប៉ុន្តែដើម្បីរក្សាសុវត្ថិភាព សុខភាពជូនបងប្អូនទាំងអស់ សូមឱ្យបងប្អូនអនុវត្តតាមការណែនាំរបស់សុខាភិបាលសិន គឺត្រូវនៅដាច់ដោយឡែក១៤ថ្ងៃ រងចាំយកសំណាកពិនិត្យលើកទី២ ម្តងទៀត ប្រសិនបើនៅតែអវិជ្ជមាន គឺរដ្ឋបាលខេត្តនឹងបើកឱ្យបងប្អូនមានសេរីភាពវិញមិនខាន ដាច់ខាតមិនទុកទេ ។

ឯកឧត្តមបន្តថា ក្នុងនាមសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មិនទុកឱ្យបងប្អូនណាម្នាក់អត់អាហារនោះទេ ថ្វីត្បិតតែក្រុមការងារមករៀងយឺតបន្តិចមែន តែក៏នៅតែបាននាំយកស្បៀងអាហារបានដល់ដៃបងប្អូន ហើយក៏ដោយសារតែមានបងប្អូនប្រជាពលរដ្ឋយើងច្រើន ដែលក្រុមការងារត្រូវនាំយកអំណោយឱ្យចែកជូនទើបមានការយឺតយ៉ាវបន្តិចបន្តួច ។

ក្នុងនោះដែរ ឯកឧត្តមបានណែនាំដល់បងប្អូនប្រជាពលរដ្ឋ ដែលកំពុងជាប់ធ្វើចត្តាឡីស័ក ធ្វើយ៉ាងណាត្រូវរក្សាអនាម័យជាប់ជាប្រចាំ ដោយសម្អាតដៃ នឹងអាល់កុល ឬសាប៊ូ ។ មួយវិញទៀត ពេលចាំបាច់ត្រូវចេញពីផ្ទះមួយទៅផ្ទះមួយ ត្រូវពាក់ម៉ាស់ និងរក្សាគម្លាត ជាពិសេសបន្តអនុវត្តឱ្យបានខ្ជាប់ខ្ជួននូវវិធានការ ៣កុំ ៣ការពារ របស់រាជរដ្ឋាភិបាល និងការណែនាំរបស់ក្រសួងសុខាភិបាលកម្ពុជា ក្នុងការប្រយុទ្ធប្រឆាំង នឹងជំងឺកូវីដ១៩ ។

គួរបញ្ជាក់ថា អំណោយដែលត្រូវបានចែកជូនគ្រួសារប្រជាពលរដ្ឋ ដែលកំពុងជាប់ធ្វើចត្តាឡីស័ក តាមផ្ទះខាងលើ ក្នុង១គ្រួសារ ទទួលបាន ៖ អង្ក ២៥គីឡូក្រាម, ត្រីខ១យួរ, ទឹកត្រី១យួរ, ទឹកស៊ីអ៊ីវ១យួរ ៕

អត្ថបទ ៖ ពៅ