ពលរដ្ឋ អាហ្វហ្គានីស្ថាន ដែលមានឯកសារស្របច្បាប់ សង្ឃឹមជម្លៀសចេញពីប្រទេស ក្រោយដាច់ខែនេះ

ក្រុមតាលីបង់បានប្រាប់ប្រទេសអាល្លឺម៉ង់ថា ពលរដ្ឋអាហ្វហ្គានីស្ថានដែលមានឯកសារស្របច្បាប់ នឹងអាចធ្វើដំណើរតាមជើងហោះហើរពាណិជ្ជកម្ម ក្រោយហួសថ្ងៃទី ៣១ ខែសីហា បន្ទាប់ពីការជម្លៀសចេញពីអាកាសយានដ្ឋានក្រុងកាប៊ុល នឹងលែងត្រូវបានអនុញ្ញាត ។

បេសកជនអាល្លឺម៉ង់ប្រចាំប្រទេសអាហ្វហ្គានីស្ថានលោក Markus Potzel ដែលកំពុងចរចាជាមួយក្រុមតាលីបង់នៅទីក្រុងដូហា បាននិយាយនៅលើបណ្តាញសង្គម Twitter ថា “ប្រធានការិយាល័យនយោបាយរបស់តាលីបង់លោក Sher Mohammad Abbas Stanekzai ធានាខ្ញុំថា ជនជាតិអាហ្វហ្គានីស្ថានដែលមានឯកសារស្របច្បាប់ នឹងបន្តមានឱកាសធ្វើដំណើរតាមជើងហោះហើរពាណិជ្ជកម្ម បន្ទាប់ពីថ្ងៃទី ៣១ ខែសីហា” ។

លោក Potzel ដែលបានចរចាទ្រង់ទ្រាយធំជាមួយតាលីបង់នាពេលកន្លងមក បានបន្ថែមថា “យើងបាននិយាយអំពីតម្រូវការបន្ទាន់សម្រាប់អាកាសយានដ្ឋាននៅកាប៊ុល ជាតម្រូវការចម្បងសម្រាប់វត្តមានការទូត និងអង្គការក្រៅរដ្ឋាភិបាលនៅក្នុងប្រទេសអាហ្វហ្គានីស្ថាន” ។

បើយោងតាមទីភ្នាក់ងារសារព័ត៌មាន REUTERS បានឲ្យដឹងថា តាលីបង់បានសុំជំនួយពីប្រទេសទួរគីសម្រាប់ជំនួយបច្ចេកទេស ក្នុងការដំណើរការអាកាសយានដ្ឋានទីក្រុងកាប៊ុល បន្ទាប់ពីការចាកចេញរបស់កងកម្លាំងបរទេស ប៉ុន្តែបានទទូចថា យោធារបស់ទីក្រុងអង់ការ៉ាក៏ត្រូវតែដកចេញវិញផងដែរ ត្រឹមថ្ងៃផុតកំណត់ទី ៣១ ខែសីហា ។

ទន្ទឹមនោះ ក្រសួងការពារជាតិទួរគីកាលពីថ្ងៃពុធបាននិយាយថា ពួគេបានចាប់ផ្តើមជម្លៀសកងទ័ពចេញពីអាហ្វហ្គានីស្ថាន ខណៈអាកាសយានដ្ឋានអន្តរជាតិក្រុងកាប៊ុល ត្រូវបានការពារដោយកងទ័ពអាមេរិក និងអង់គ្លេស ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ ជនភៀសខ្លួន អាហ្វហ្គានីស្ថាន ច្រើននាក់តេស្តវិជ្ជមានកូវីដ ហើយសុទ្ធតែមិនបញ្ចេញរោគសញ្ញា