ផ្សាយ​ផ្ទាល់ពិសេស ការ​ដាក់​ឲ្យ​ប្រើប្រាស់​ប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន

នៅម៉ោង ០៩ ព្រឹកនេះ មានកម្មវិធី​ផ្សាយផ្ទាល់ពិសេស​ពី​ពិធីដាក់ឲ្យ​ដំណើរការផ្លូវការ ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានដំណាក់កាលទី ២ តាមរយៈទំព័រហ្វេសប៊ុករបស់ក្រសួងសេដ្ឋកិច្ចនិងហិរញ្ញវត្ថុ។

រៀបចំកម្មវិធីដោយក្រសួងសេដ្ឋកិច្ចនិងហិរញ្ញវត្ថុ, គណៈកម្មាធិការគោលនយោបាយសេដ្ឋកិច្ចនិងហិរញ្ញវត្ថុ និង Techo Startup Center សហការដោយ ក្រសួងពាណិជ្ជកម្ម Ministry of Commerce អគ្គនាយកដ្ឋានពន្ធដារ General Department of Taxation, ក្រសួងការងារនិងបណ្តុះបណ្តាលវិជ្ជាជីវៈ ក្រសួងមហាផ្ទៃ Ministry of Interior Cambodia ក្រុមប្រឹក្សាអភិវឌ្ឍន៍កម្ពុជា The Council for the Development of Cambodia, Ministry of Industry, Science, Technology & Innovation, ក្រសួងទេសចរណ៍ Ministry of Tourism, Cambodia, ក្រសួងប្រៃសណីយ៍ និងទូរគមនាគមន៍ – Ministry of Post and Telecommunications, និយ័តករអាជីវកម្មអចលនវត្ថុ និងបញ្ចាំ។

ក្រសួងសេដ្ឋកិច្ច​និង​ហិរញ្ញវត្ថុបាន​ជូនដំណឹង​ ពី​ការ​ដាក់​ឲ្យ​ដំណើរការ​ប្រព័ន្ធ​ចុះបញ្ជី​អាជីវកម្ម​តាម​ថ្នាល​បច្ចេកវិទ្យា​ព័ត៌មាន​ដំណាក់កាល​ទី២ ចាប់ពី​ថ្ងៃទី​១ ខែកញ្ញា ឆ្នាំ​២០២១ តទៅ​។​

បើ​យោង​តាម​សេចក្តីប្រកាសព័ត៌មាន​ ប្រ​ព័ន្ធ​ចុះបញ្ជី​អា​ជីវក​ម្មតាម​ថ្នាល​បច្ចេកវិទ្យា​ព័ត៌មាន ជា​ការកែទម្រង់​​របស់​រដ្ឋាភិបាល​ ដែល​បាន​ដាក់ចេញក្នុង​វេទិកា​រាជរដ្ឋាភិបាល​-​ផ្នែក​ឯកជន លើក​ទី​១៨ កាលពី​ថ្ងៃទី​២៩ ខែមីនា ឆ្នាំ​២០១៩ កន្លងទៅ។​

ការចុះបញ្ជី​អាជីវកម្ម​តាម​ថ្នាល​បច្ចេកវិទ្យា​ព័ត៌មាន​ ជួយ​ឲ្យ​ចំណេញ​ពេលវេលា កាត់បន្ថយ​ការចំណាយ​ក្រៅ​ផ្លូវការ​។ ប្រព័ន្ធ​ចុះបញ្ជី​ថ្មី​នេះ ​តម្រូវ​ឲ្យ​ក្រុមហ៊ុន​បំពេញ​ទម្រង់​ចុះបញ្ជី​អាជីវកម្ម​តែ ១ ​លើក​គត់​ដោយ​ចំណាយពេល​យ៉ាងយូរ ៨ ​ថ្ងៃ​។ រាល់​ទិន្នន័យ​របស់​ក្រុមហ៊ុន​ចុះបញ្ជី​អាជីវកម្ម​ នឹងត្រូវ​បញ្ជូន​ដោយ​ស្វ័យប្រវត្តិ​ទៅ​ក្រសួង​​សេដ្ឋកិច្ច និង​ហិរញ្ញវត្ថុ ក្រសួង​ពាណិជ្ជកម្ម ក្រសួង​ការងារ ក្រសួង​មហាផ្ទៃ ក្រុមប្រឹក្សា​អភិវឌ្ឍន៍​កម្ពុជា និង​​អគ្គនាយកដ្ឋាន​ពន្ធដារ ដើម្បី​ត្រួតពិនិត្យនិង​អនុម័ត​។

មកដល់​ពេលនេះ មាន​ក្រសួង និង​ស្ថាប័នរដ្ឋ​យ៉ាងហោច​ចំនួន​ ៦ បាន​ដាក់បញ្ចូល​ក្នុង​ប្រព័ន្ធ​អាជីវកម្ម​តាម​ថ្នាល​បច្ចេកវិទ្យា​ព័ត៌មាន រួមមាន​ក្រសួងពាណិជ្ជកម្ម ក្រសួង​សេដ្ឋកិច្ច និង​ហិរញ្ញវត្ថុ ក្រសួង​ការងារ និង​បណ្តុះបណ្តាល​វិជ្ជាជីវៈ ក្រសួងមហាផ្ទៃ ក្រុមប្រឹក្សា​អភិវឌ្ឍន៍​កម្ពុជា និង​អគ្គនាយកដ្ឋាន​ពន្ធដារ​៕