លោកបណ្ឌិត សុខ ទូច ស្លៀកពាក់សាមញ្ញ ចុះទៅដាំកូនឈើប្រណិត តែបែរជាត្រូវគេរិះគន់ថា ស្លៀកពាក់មិនសក្តិសមជាមេដឹកនាំ

លោកបណ្ឌិត សុខ ទូច ត្រូវបានមនុស្សមួយចំនួនរិះគន់ ការស្លៀកពាក់របស់លោក ថា មិនសក្តិសមជាមេដឹកនាំ ជាប្រធានរាជបណ្ឌិត្យសភាកម្ពុជា។ ការរិះគន់នេះ គ្រាដែលលោកបណ្ឌិត សុខ ទូច បានស្លៀកពាក់ សាមញ្ញ ដឹកនាំ​​ម​ន្ត្រី​​រាជបណ្ឌិត្យសភា ចុះទៅដាំកូនឈើប្រណិត ( ធ្នង់) ចំនួន៤ពាន់ដើម នៅឧទ្យានរាជបណ្ឌិត្យសភាកម្ពុជាតេជោ ឬស្សីត្រឹប កាលពីថ្ងៃទី៥ ខែកញ្ញា ឆ្នាំ២០២១។

លោកបណ្ឌិត សុខ ទូច សរសេរនៅលើគណនីហ្វេសប៊ុក របស់លោក នារសៀលថ្ងៃទី៦ ខែកញ្ញានេះថា «មានអ្នកសួរខ្ញុំច្រើនណាស់ថា ស្លៀកពាក់មិនសក្តិសមជាមេដឹកនាំ ជាប្រធានរាជបណ្ឌិត្យសភាកម្ពុជា។ សូមអភ័យទោស ខ្ញុំមិនឆ្លើយតបទេ តែខ្ញុំទៅនេះ មិនមែនទៅក្នុងនាមប្រធានរាជបណ្ឌិត្យសភាកម្ពុជាទេ ខ្ញុំទៅដាំដើមឈើ ខ្ញុំចុះមើលក្រោលគោ មើលក្រោលក្របី»។

លោកបណ្ឌិត សុខ ទូច បានសរសេរបន្តថា «ហើយកាលដែលមានជាតិអំបិលឡើង នៅលើអាវនេះគឺ អ្វីៗខ្ញុំកាន់ដោយខ្លួនឯង ព្រោះមិនមានប្រាក់ខែបើក ឱ្យអ្នកបើកឡាន ឬអ្នកយួរកាបូបទេ ដូច្នេះអ្វីៗខ្ញុំធ្វើដោយខ្លួនឯង ហេតុនេះទើបធ្វើឱ្យបែកញើសបែបនេះ។ សូមអរគុណ ចំពោះអ្នករិះគន់ នេះគឺជីវិតរបស់អ្នកស្រាវជ្រាវវាបែបនេះ»៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត