ផ្លូវហាយវ៉េបែលហ្ស៊ិក រាប់គីឡូម៉ែត្រ ក្លាយជាភ្នំសំរាម

នៅភាគខាងកើតប្រទេសបែលហ្ស៊ិក ផ្លូវហាយវ៉េដែលគេបោះបង់ចោលមួយ ស្ទើរតែកប់ទាំងស្រុងនៅក្រោមគំនរសំរាមរាប់គីឡូម៉ែត្រ។

ការចាក់សំរាមបណ្តោះអាសន្នដែលរួមមានកម្ទេចកម្ទី ចំនួន ៩០,០០០ តោន លាតសន្ធឹងចម្ងាយ ៨ គីឡូម៉ែត្រ តាមបណ្តោយផ្លូវហាយវ៉េ A601 ខាងជើងទីក្រុង Liege គឺជាសក្ខីភាពនៃការបំផ្លិចបំផ្លាញដែលបង្កឡើងដោយទឹកជំនន់មិនធ្លាប់មានពីមុនមក កាលពីពាក់កណ្តាលខែកក្កដា។

នៅពេលផ្ទះសម្បែង សាលារៀននិងអាជីវកម្មរបស់ប្រជាពលរដ្ឋ Wallonia ត្រូវបានបំផ្លាញដោយទឹកជំនន់ អាជ្ញាធរបានប្រឈមមុខនឹងភ្នំសំរាមមួយរំពេច។

Luc Joine ប្រធានសេវាកម្មបោសសម្អាតសំរាមទីក្រុង Liege ហៅកាត់ INTRADEL បាននិយាយប្រាប់ AFP ថា “ឧបករណ៍ប្រើប្រាស់ក្នុងផ្ទះរបស់ពួកគេដូចជាទូដាក់ចាន ឬគ្រឿងសង្ហារិម ត្រូវបានបំផ្លាញ។ ដូច្នេះហើយ ពួកគេបានដាក់វាលើផ្លូវនៅខាងក្រៅកន្លែងរបស់ពួកគេ ហើយសាលាក្រុងត្រូវបង្ខំចិត្តបោសសម្អាតតាមដងផ្លូវសម្រាប់ហេតុផលសុវត្ថិភាព”។

INTRADEL បានកំណត់ទីតាំងបណ្តោះអាសន្នចំនួន៣ ដើម្បីដាក់សំរាម ១៦០,០០០ តោន ដែលត្រូវបានដឹកយកចេញ។

បន្ទាប់ពីការត្រួតពិនិត្យដំបូងដោយប៉ូលិសដើម្បីធានាថាគ្មានសាកសពមនុស្សត្រូវបានកប់នៅក្នុងគំនរសំរាមនោះ រដ្ឋាភិបាលក្នុងតំបន់ក៏បានចូលទៅ។

Joine បានពន្យល់ថា ផ្ទៃផ្លូវខាងលើបានការពារការបំពុលដែលជ្រាបចូលទៅក្នុងដី ខណៈឆ្មាំត្រូវបានដាក់ពង្រាយគ្រប់ពេលវេលាដើម្បីបញ្ឈប់ការបន្ថែមសំរាម។

បុគ្គលិកសម្លាប់សត្វល្អិត ក៏បានធ្វើដំណើរឆ្លងកាត់ជាប្រចាំផងដែរ ដើម្បីកម្ចាត់សត្វកណ្តុរហើយរថយន្តបាញ់ទឹក កំពុងជួយបំបាត់ធូលីនិងក្លិនមិនល្អ៕

ប្រែសម្រួល៖ Vann Vann

ចុចអាន៖ ទឹកជំនន់មរណៈនៅ អាល្លឺម៉ង់និងបែលហ្សិក សម្លាប់មនុស្សកើនដល់ជិត ១០០នាក់