បេសកកម្ម ៩០ ថ្ងៃត្រូវបានបញ្ចប់ យាន Shenzhou-12 របស់ ចិន ត្រឡប់មកផែនដីវិញ ចុះចតដោយសុវត្ថិភាព (មានវីដេអូ)

ទូរទស្សន៍ CCTV របស់ចិនបានបង្ហាញវីដេអូនៃការចុះចតរបស់យានអវកាស Shenzhou-12 នៅវាលខ្សាច់ Gobi ។

អវកាសយានិកចិន ៣ រូបគឺលោក Nie Haisheng លោក Liu Boming និងលោក Tang Hongbo បានវិលត្រឡប់មកផែនដីវិញនៅថ្ងៃទី ១៧ ខែកញ្ញានេះ បន្ទាប់ពីបានបញ្ចប់បេសកម្មលើកដំបូងរបស់ប្រទេសនេះរយៈពេល ៩០ ថ្ងៃទៅកាន់ស្ថានីយ៍តារាវិថី Tiangong ចាប់តាំងពីឆ្នាំ ២០១៦ ។

យោងតាមប្រព័ន្ធផ្សព្វផ្សាយរដ្ឋចិនបានឲ្យដឹងថា យាន Shenzhou-12 បានចុះចតដោយសុវត្ថិភាពនៅតំបន់ស្វយ័ត Inner Mongolia ភាគខាងជើងប្រទេសចិននៅវាលខ្សាច់ Gobi ។

គួររំឭកថា កាលពីថ្ងៃទី ៤ ខែកក្កដា អវកាសយានិកចិនបានសម្តែងការដើរលំហអាកាសលើកដំបូង ក្នុងរយៈពេល ១៣ ឆ្នាំ បន្ទាប់ពីយានអវកាស Shenzhou-12 ដែលដឹកអវកាសយានិកបានចូលចតដោយជោគជ័យជាមួយបន្ទប់ស្នូល Tianhe នៃស្ថានីយ Tiangong កាលពីខែមិថុនា ។

Tiangong គឺជាគន្លងស្ថានីយអនាគតរបស់ចិន ប៉ុន្តែវានៅតែត្រូវបានសាងសង់ ខណៈបន្ទប់ស្នូ Tianhe គឺជាមជ្ឈមណ្ឌលត្រួតពិនិត្យរបស់ស្ថានីយ Tiangong ។ វាត្រូវបានបញ្ជូនទៅស្ថានីយ៍អវកាសដោយរ៉ុកកែតផ្ទុកយន្តហោះ Long March 5B នៅចុងខែមេសា ។

ទន្ទឹមនោះ ទីក្រុងប៉េកាំងរំពឹងថានឹងបញ្ចប់ការដំឡើងស្ថានីយ៍អវកាសដំបូងរបស់ខ្លួននៅក្នុងគន្លងផែនដីទាបនៅឆ្នាំ ២០២២ ។ ប្រទេសនេះបានរៀបចំផែនការបេសកកម្មជាច្រើនទាំងកប៉ាល់ដឹកទំនិញ និងនាវិកនៅទូទាំងឆ្នាំ ២០២១ និង ២០២២ ដើម្បីបញ្ចប់ការសាងសង់ស្ថានីយមួយនេះ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ វេបសាយ ចិន ចុះផ្សាយថា ភ្នំពេញ ជារាជធានីមានអ្នកចាក់វ៉ាក់សាំងកូវីដ ច្រើនបំផុតលើពិភពលោក