ជំនន់ទឹកភ្លៀង ប៉ះពាល់ក្រុងស្រុក ៥ នៅបន្ទាយមានជ័យ ពលរដ្ឋជាង ១ ពាន់គ្រួសារត្រូវបានជម្លៀស

ជំនន់ទឹកភ្លៀង បានវាយប្រហារខេត្តបន្ទាយមានជ័យ បណ្ដាលឱ្យក្រុងស្រុកចំនួន ៥ រងផលប៉ះពាល់ជាងគេ ក្នុងនោះអាជ្ញាធរបានជម្លៀសប្រជាពលរដ្ឋប្រមាណជាង ១ ពាន់គ្រួសារ (១ ០២៩) ទៅកាន់ទីទួលសុវត្ថិភាព។

របាយការណ៍របស់រដ្ឋបាលខេត្តបន្ទាយមានជ័យ បង្ហាញថា ក្រុងសិរីសោភ័ណ ពលរដ្ឋចំនួន ៦១៧ គ្រួសារ ត្រូវបានជម្លៀសទៅទីទួលសុវត្ថិភាព និងប៉ះពាល់ដល់ស្រូវជាង ៣ ពាន់ហិកតា (៣ ២៥៥)។

ក្រុងប៉ោយប៉ែតជម្លៀស ១៨២ គ្រួសារ ប៉ះពាល់ស្រូវ ៥ ហិកតា ស្រុកអូរជ្រៅ ជម្លៀសពលរដ្ឋ ៤៥ គ្រួសារ ប៉ះពាល់ស្រូវ ២ ៣៦១ ហិកតា ស្រុកភ្នំស្រុកជម្លៀសទៅទីទួលសុវត្តិភាពមានចំនួន ៥៩ គ្រួសារ ៧.៦១៧ហិកតា ស្រុកមង្គលបុរី ជម្លៀស ទៅទីទួលសុវត្តិភាពមាន ១២៦គ្រួសារ ប៉ះពាល់ស្រូវ ៥ ៩០១ ហិកតា។

សរុបផលប៉ះពាល់ និងខូចខាតដោយគ្រោះទឹកជំនន់រួមមាន គ្រួសារខ្នងផ្ទះ ៨ ៥១១ ជម្លៀសពលរដ្ឋ ១ ០២៩ គ្រួសារ ប៉ះពាល់ដំណាំស្រូវ ជាង ២ ម៉ឺនហិកតា (២៥ ២២៣) ដំឡូងមី ២២២ ហិកតា ព្រមទាំងប៉ះពាល់ដល់ផ្លូវចំនួន ៥៤១។

រដ្ឋបាលខេត្តបានប្រាប់អ្នកយកព័ត៍មានឱ្យដឹងថា ផលប៉ះពាល់ និងខូចខាតដោយគ្រោះទឹកជំនន់ទឹកភ្លៀងក្នុងខេត្តបន្ទាយមានជ័យខ្លាំងជាងគេគឺ ក្រុងសិរីសោភ័ណ ស្រុកមង្គលបូរី ក្រុងប៉ោយប៉ែត ស្រុកអូរជ្រៅ ស្រុកភ្នំស្រុក៕

អត្ថបទៈ វ៉ាន់ ណាង