អាជ្ញាធរចុះរៀបចំសណ្តាប់ធ្នាប់ តាមបណ្តោយផ្លូវព្រះមុនីរ៉េត បញ្ចៀសកកស្ទះចរាចរណ៍

អភិបាលខណ្ឌបឹងកេងកង បានដឹកនាំមន្ត្រីក្រោមឱវាទចុះរៀបចំសណ្តាប់ធ្នាប់តាមបណ្តោយផ្លូវ ព្រះមុនីរ៉េត ស្ថិតក្នុងសង្កាត់ទួលស្វាយព្រៃទី២ ខណ្ឌបឹងកេងកង រាជធានីភ្នំពេញ ដោយសារតែបងប្អូនអាជីករមួយចំនួនដាក់តាំងទំនិញលក់ទំនិញអត់សណ្តាប់ធ្នាប់ ដែលធ្វើឱ្យកកស្ទះចរាចរណ៍ និងប៉ះពាល់សោភ័ណ្ឌភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីសាលាខណ្ឌបឹងកេងកង ប្រាប់ឱ្យដឹងថា កាលពីយប់ថ្ងៃព្រហស្បតិ៍ ទី២១ ខែតុលា ឆ្នាំ២០២១ រដ្ឋបាលខណ្ឌបឹងកេងកង មាន លោក ធឹម សំអាន អភិបាល នៃគណៈអភិបាលខណ្ឌបឹងកេងកង បានដឹកនាំមន្ត្រីក្រោមឱវាទចុះរៀបចំសណ្តាប់ធ្នាប់ តាមបណ្តោយផ្លូវព្រះមុនីរ៉េត ក្នុងសង្កាត់ទួលស្វាយព្រៃទី២ ខណ្ឌបឹងកេងកង រាជធានីភ្នំពេញ ធ្វើយ៉ាងណាតម្រូវឱ្យមានការលក់ដូរទំនិញមានរបៀបរៀបរយល្អ ជៀសវាងឱ្យបាននូវការដាក់តាំងទំនិញគ្រប់ប្រភេទលក់គ្មានសណ្តាប់ធ្នាប់ ដែលបណ្តាលឱ្យមានការកកស្ទះចរាចរណ៍ និងប៉ះពាល់សោភ័ណ្ឌភាពនៅក្នុងរាជធានីភ្នំពេញ។

ជាមួយគ្នានេះ លោកអភិបាលខណ្ឌបឹងកេងកង បានណែនាំឱ្យបងប្អូនអាជីវករទាំងអស់ ត្រូវពង្រឹងនូវការថែរក្សា  អនាម័យ បរិស្ថាន រៀបចំទុកដាក់សំរាមឱ្យបានត្រឹមត្រូវ និងរួមគ្នាបន្តគោរពអនុវត្តវិធានការ ៣ការពារ និង៣កុំ ឱ្យបានខ្ជាប់ខ្ជួន ដើម្បីកាត់ផ្តាច់ការចម្លងជំងឺកូវីដ-១៩៕

អត្ថបទ៖ រ៉ាវុទ្ធ