KPT+

កំពុងគាបធ្មេញ តិចច្រឡំធ្វើរឿងអស់នេះ យ៉ាប់ហើយ!

បានផុស

៥ years មុន

នៅ

ថ្ងៃសុក្រ ៥ វិច្ឆិកា ២០២១

ដោយ

សម័យនេះ ការពត់ធ្មេញកំពុងតែមានការពេញនិយមខ្លាំង ចំពោះមនុស្សគ្រប់វ័យ ប៉ុន្តែវាផ្តល់ផលពិបាកមិនតិចទេ ចំពោះអ្នកដែលគាប។ មានរឿងរ៉ាវមួយចំនួនដែលវេជ្ជបណ្ឌិតជំនាញកៀបធ្មេញ ក៏ដូចជាអ្នកដែលមានបទពិសោធន៍កៀបធ្មេញ ហាមដាច់ខាតមិនត្រូវធ្វើពេលកំពុងកៀបធ្មេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១.ញាំអាហាររឹងៗ

វេជ្ជបណ្ឌិតឯកទេសមាត់ធ្មេញ នៃមន្ទីរពេទ្យឯកជនព្យាបាលធ្មេញ រៀលធីស បានឲ្យដឹងថា ក្នុងអំឡុងពេលពត់ធ្មេញ មិនត្រូវភ្លេចខ្លួន ហើយទៅញាំអាហាររឹងៗនោះទេ ព្រោះវាងាយធ្វើឲ្យលួសគាបធ្មេញបាក់ ឬរបូតដង្កៀបគាបធ្មេញដែលធ្វើឲ្យមានការឈឺចាប់ បើធ្ងន់ធ្ងរអាចបណ្តាលឲ្យបាក់ធ្មេញផងក៏មាន។

២.ទំពាស្ករកៅស៊ូ

និស្សិតមិនបញ្ចេញឈ្មោះម្នាក់នៃសាកលវិទ្យាល័យ Zaman ប្រាប់ថា នៅពេលដែលទំពាស្ករកៅស៊ូ វានឹងស្អិតជាប់ធ្មេញ មានន័យថា វាក៏ស្អិតជាប់នឹងដង្កៀប ឬលួសដែលគាបធ្មេញផងដែរ។ ការទំពាស្ករកៅស៊ូ អាចធ្វើឲ្យរបូតដង្កៀប ឬអាចប៉ះពាល់ដល់ទម្រង់ធ្មេញដែលកំពុងកៀបតម្រង់ឲ្យស្អាត។

៣.ដួល ឬបុកចំធ្មេញ

យុវជន វីរៈ សីហរាជ ធ្លាប់ជាអ្នកមានបទពិសោធន៍ក្នុងការគាបធ្មេញ បានពន្យល់ពីបញ្ហានេះថា ជាទូទៅ បញ្ហានេះមិនអាចកើតឡើងបានដោយចេតនាទេ ប៉ុន្តែបើជួបហេតុការណ៍ណាមួយគឺមិនត្រូវឲ្យប៉ះពាល់ដល់ធ្មេញឡើយ ព្រោះកាលណាបើធ្មេញបុកនឹងអ្វីម៉្យាង វាអាចបណ្តាលឲ្យបាក់ធ្មេញ ពេលខ្លះវាអាចបាក់ទាំងអស់តែម្តង ដោយសារតែធ្មេញគាបជាប់គ្នា។

៤. ប្រើប្រាស់ធ្មេញជាឧបករណ៍

វេជ្ជបណ្ឌិតនៃមន្ទីរពេទ្យព្យាបាលធ្មេញ រៀលធីសដដែល បានបញ្ជាក់ថា ពេលខ្លះវាជាទម្លាប់មួយដែលយើងប្រើប្រាស់ធ្មេញ សម្រាប់ជាឧបករណ៍បើក ឬហែកអ្វីមួយ តែទម្លាប់នេះមិនត្រូវធ្វើបានទេ នៅពេលដែលកំពុងគាបធ្មេញ។ដូចនឹងបញ្ហាផ្សេងទៀតដែរ វាអាចបណ្តាលឲ្យរបូតដង្កៀប ឬលួសគាបធ្មេញ ឬបណ្តាលឲ្យបាក់ធ្មេញក៏ថាបាន។

ម៉្យាងវិញទៀត ការគាបធ្មេញទាមទារឲ្យមានអនាម័យមាត់ល្អ ដូចនេះមិនត្រូវភ្លេចសម្អាតមាត់ធ្មេញរៀងរាល់ពេលញាំចំណីអាហាររួចទេ វាមិនបណ្តាលឲ្យខូចលួស ឬដង្កៀបគាបធ្មេញទេ តែវាអាចធ្វើឲ្យធ្មេញពុក ឬដង្កូវស៊ីធ្មេញបាន៕

អត្ថបទផ្ដល់ដោយ៖ Hello Krupet

ចុចអាន៖មូលហេតុសំខាន់ៗ ម៉េចបានធាត់ និងប្រភេទអ្នកធាត់ទាំង ៦ យ៉ាង

ចុចអាន៖បង្ការបាត់បង់សាច់ដុំនៅវ័យចំណាស់ អនុវត្តតិចនិកទាំង ៦នេះ

Related Topics:គាបធ្មេញ