ស្ថានការណ៍នៅព្រំដែន ប៉ូឡូញ-បេឡារុស កាន់តែតានតឹង (មានវីដេអូ)

កងកម្លាំងប៉ូឡូញ បានប្រើប្រាស់ឧស្ម័នបង្ហូរទឹកភ្នែក និងកាណុងបាញ់ទឹក បាញ់ទៅលើជនចំណាកស្រុកដែលព្យាយាមឆ្លងចូលក្នុងប្រទេស មកពីខាង បេឡារុស។

អស់រយៈពេលជាច្រើនសប្តាហ៍មកហើយ ជនចំណាកស្រុករាប់ពាន់នាក់ ដែលភាគច្រើនមកពីតំបន់មជ្ឈិមបូព៌ា បានប្រមូលផ្តុំគ្នានៅព្រំដែនបេឡារុស ក្នុងការប៉ុនប៉ងឆ្ពោះទៅកាន់សហភាពអឺរ៉ុប។

ស្របពេលជាមួយគ្នានោះដែរ ប្រទេសបេឡារុស ​ត្រូវ​​គេ​ចោទ​ប្រកាន់​ថា ​បាន​ជំរុញ​ជន​ចំណាក​ស្រុកឲ្យ​ទៅ​ព្រំដែន ​ដើម្បី​ព្យាយាម​ធ្វើ​ឲ្យ​សហភាព​អឺរ៉ុប ​អស្ថិរភាព។

ទីភ្នាក់ងារព្រំដែនប៉ូឡូញបាននិយាយថា មានការប៉ុនប៉ងជាង ៥,០០០ ដង ដោយជនចំណាកស្រុកដើម្បីឆ្លងព្រំដែនពីបេឡារុស ចូលទៅ ប៉ូឡូញ ក្នុងខែនេះ បើធៀបនឹងត្រឹមតែ ៨៨ ដងប៉ុណ្ណោះកាលពីឆ្នាំមុន។

ជនចំណាកស្រុក រួមទាំងកុមារផងដែរ បានរស់នៅក្នុងជំរំបណ្ដោះអាសន្ន ក្នុងស្ថានភាពដ៏ត្រជាក់នៅប្រទេសបេឡារុស។ ក្នុងរយៈពេលប៉ុន្មានថ្ងៃថ្មីៗនេះ មនុស្សរាប់ពាន់នាក់ក៏បានប្រមូលផ្តុំគ្នានៅច្រកព្រំដែន Kuznica ភាគខាងត្បូងតំបន់ Grodno ភាគពាយព្យប្រទេសផងដែរ។

កាលពីថ្ងៃចន្ទ ជនចំណាកស្រុកជាច្រើននាក់ បានសម្រុកចូលតាមរបង ហើយប្រមូលផ្តុំគ្នានៅច្រកព្រំដែនមួយ ខាងព្រំដែនបេឡារុស។ យ៉ាងណាក្តី ពួក​គេ​ត្រូវ​បាន​រារាំង​ដោយ​ទាហាន​ប៉ូឡូញ ហើយ​ការ​ប្រឈម​មុខ​ដាក់គ្នាដ៏តាន​តឹង​បាន​កើត​ឡើង។

នៅព្រឹកថ្ងៃអង្គារ ក្រសួងការពារជាតិប៉ូឡូញនិយាយថា កងកម្លាំងរបស់ខ្លួនបានឆ្លើយតបទៅនឹងជនចំណាកស្រុកដែលវាយប្រហារលើរបងព្រំដែននៅតំបន់ Kuznica។

មន្ត្រីប៉ូឡូញម្នាក់បានរងរបួសយ៉ាងធ្ងន់ធ្ងរដោយសារតែវត្ថុដែលគប់ឆ្លងព្រំដែន ហើយកំពុងសម្រាកនៅមន្ទីរពេទ្យ ជាមួយរបួសបាក់ឆ្អឹងលលាដ៍ក្បាល៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ ណាតូ ព្រមានអំពីការបង្កើនកងទ័ពរុស្ស៊ី នៅជាប់ព្រំដែន អ៊ុយក្រែន