ថៃ តាមរកទេសចរអាហ្វ្រិកជិត ៨០០នាក់ ដើម្បីតេស្តរក Omicron ក្នុងនោះ មានខ្លះចាកចេញពីប្រទេសបាត់ហើយ (មានវីដេអូ)

ការិយាល័យអន្តោប្រវេសន៍ និងក្រសួងសុខាភិបាលសាធារណៈថៃ កំពុងតាមដានអ្នកដំណើរអាហ្វ្រិកប្រហែល៧៨៣នាក់ ដែលបានចូលប្រទេសចាប់តាំងពីថ្ងៃទី១៥ខែវិច្ឆិកាមក។

ថៃ កំពុងស្វែងរក ដើម្បីធ្វើតេស្តពួកគេរកវីរុសកូវីដ១៩បំប្លែងខ្លួន Omicron នៅក្នុងវិធានការមួយដែលមានគោលបំណងបង្កើនសុវត្ថិភាពសាធារណៈ។

មេប៉ូលិសជាតិ លោក Suwat Jangyodsuk បាននិយាយថា ភ្ញៀវទេសចរអាហ្វ្រិក ត្រូវបានគេជឿថា ស្ថិតនៅក្នុងគោលដៅទេសចរណ៍សំខាន់ៗ រួមទាំងទីក្រុងបាងកកផងដែរ ហើយអាជ្ញាធរកំពុងព្យាយាមទាក់ទងពួកគេ និងស្នើសុំឲ្យពួកគេធ្វើតេស្ត ដើម្បីរកមើលថាតើពួកគេមានផ្ទុកមេរោគប្រភេទថ្មីដែរឬក៏អត់។

លោកនិយាយថា ប៉ូលិសអន្តោប្រវេសន៍ និងក្រសួង ក៏កំពុងបង្កើនវិធានការត្រួតពិនិត្យកូវីដនៅតាមអាកាសយានដ្ឋានផងដែរ ដើម្បីទប់ទល់នឹងការគំរាមកំហែងផ្នែកសុខភាពដែលកាន់តែខ្លាំងឡើងដោយសារវីរុសបំប្លែងខ្លួនប្រភេទថ្មី។

អាជ្ញាធរសន្តិសុខ ក៏កំពុងបង្កើនវិធានការសន្តិសុខតាមព្រំដែនផងដែរ ដើម្បីទប់ស្កាត់ការឆ្លងដែនខុសច្បាប់តាមច្រកធម្មជាតិក្នុងខេត្តជាប់ព្រំដែន។

ស្របពេលជាមួយគ្នានោះ លោកវេជ្ជបណ្ឌិត Taweesilp Visanuyothin អ្នកនាំពាក្យមជ្ឈមណ្ឌលគ្រប់គ្រងស្ថានការណ៍កូវីដ (CCSA) បាននិយាយថា ចាប់ពីថ្ងៃទី១៥ខែវិច្ឆិកា រហូតដល់ថ្ងៃសៅរ៍សប្តាហ៍មុន មនុស្សសរុបចំនួន៣៣៣នាក់មកពីប្រទេសនៅទ្វីបអាហ្វ្រិកភាគខាងត្បូងចំនួន៨ដែលបច្ចុប្បន្នត្រូវបានហាមឃាត់ដោយប្រទេសជាច្រើន គឺបានចូលមកប្រទេសថៃ។

ក្នុង​ចំណោម​មនុស្សទាំង៣៣៣​នាក់នោះ មាន​បី​នាក់​បាន​ចាក​ចេញ​ពី​ប្រទេស​ថៃ​រួចទៅ​ហើយ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Bangkok Post

ចុចអាន៖ នីហ្សេរីយ៉ា បញ្ជាក់ករណីដំបូងនៃវីរុសកូវីដ១៩បំប្លែងខ្លួន Omicron