ក្រុមចម្រុះដឹកនាំដោយអារ៉ាប៊ីសាអូឌីត វាយប្រហារពន្ធនាគារយេម៉ែន សម្លាប់មនុស្ស៧០នាក់

ការវាយប្រហារតាមអាកាសពីក្រុមចម្រុះដឹកនាំដោយអារ៉ាប៊ីសាអូឌីត ទៅលើពន្ធនាគារមួយក្នុងប្រទេសយេម៉ែន បានសម្លាប់មនុស្សជាង៧០នាក់។

ឧបទ្ទវហេតុនេះ បានកើតឡើងកាលពីថ្ងៃសុក្រទី២១ខែមករា នៅក្នុងទីក្រុង Saada ដែលជាបន្ទាយរឹងមាំនៃចលនាឧទ្ទាម Houthi។

ទោះបីជាយ៉ាងណាក៏ដោយ ចំនួន​អ្នក​ស្លាប់​ពិត​ប្រាកដ​មិនទាន់ត្រូវបានគេដឹង​ច្បាស់​ទេ។ អង្គការគ្រូពេទ្យគ្មានព្រំដែន បាននិយាយថា ចំនួនអ្នកស្លាប់នឹងកើនឡើង។

ស្របពេលជាមួយគ្នានោះដែរ អគ្គលេខាធិការអង្គការសហប្រជាជាតិលោក Antonio Guterres បាននិយាយថា “ការវាយប្រហារត្រូវតែបញ្ឈប់ជាដាច់ខាត” ហើយបានអំពាវនាវឲ្យមានការស៊ើបអង្កេតលើការវាយប្រហារនេះ។

គួរបញ្ជាក់ថា កងកម្លាំងចម្រុះដឹកនាំដោយអារ៉ាប៊ីសាអូឌីត បានប្រយុទ្ធជាមួយក្រុមឧទ្ទាម Houthi ចាប់តាំងពីឆ្នាំ២០១៥មក។

ជនស៊ីវិលរាប់សែននាក់ រួមទាំងកុមារជាង១ម៉ឺននាក់ផងដែរ ត្រូវបានសម្លាប់ ឬរងរបួស ដោយសារការប្រយុទ្ធគ្នាដោយផ្ទាល់។

មនុស្សរាប់លាននាក់ត្រូវបានផ្លាស់ទីលំនៅ ហើយប្រជាជនភាគច្រើន ត្រូវប្រឈមមុខនឹងគ្រោះទុរភិក្ស៕

ប្រែសម្រួល៖ Vann Vann

ប្រភព៖ BBC

ចុចអាន៖ យេម៉ែន អូសចារកម្ម ៩នាក់ មកប្រហារជីវិតជាសាធារណៈយ៉ាងសាហាវ (វីដេអូនិងរូបភាពនៅខាងក្នុង)