យេម៉ែន អូសចារកម្ម ៩នាក់ មកប្រហារជីវិតជាសាធារណៈយ៉ាងសាហាវ (វីដេអូនិងរូបភាពនៅខាងក្នុង)

បុរសប្រាំបួននាក់ ដែលគេរកឃើញថាមានពិរុទ្ធពីបទធ្វើចារកម្មនៅប្រទេសយេម៉ែន ត្រូវបានប្រហារជីវិតជាសាធារណៈដ៏ឃោរឃៅ ដោយពួកគេត្រូវបានអូសចូលទៅក្នុងទីលានមួយ រួចបង្ខំឲ្យដេកផ្កាប់មុខ ហើយត្រូវគេបាញ់ពីក្រោយខ្នង។

ពួកគេត្រូវបានផ្តន្ទាទោសនៅក្នុងការកាត់ក្តី ជាប់ពាក់ព័ន្ធនឹងការស្លាប់មន្រ្តីជាន់ខ្ពស់ក្រុម Houthi ម្នាក់ ដែលត្រូវបានសម្លាប់នៅក្នុងការវាយប្រហារអាកាសពីសំណាក់ក្រុមចម្រុះ ដឹកនាំដោយអារ៉ាប៊ីសាអ៊ូឌីតកាលពីជាងបីឆ្នាំមុន។

មនុស្សរាប់រយនាក់ដែលភាគច្រើនជាក្រុម Houthi និងអ្នកគាំទ្ររបស់ពួកគេ បានចូលរួមការប្រហារជីវិតកាលពីថ្ងៃសៅរ៍នៅទីលាន Tahrir ក្នុងរដ្ឋធានី សាណា ហើយមានអ្នកខ្លះបានរាំតាមផ្លូវទៀតផង បន្ទាប់ពីការប្រហារជីវិតនេះ។

ទោះបីជាយ៉ាងណាក៏ដោយ ការប្រហារជីវិតធ្វើឡើងដោយចលនា Houthi ដែលមានទំនាក់ទំនងជាមួយអ៊ីរ៉ង់មួយនេះ បានបង្កឲ្យមានការខឹងសម្បាជាអន្តរជាតិ ដោយសហភាពអឺរ៉ុបបានហៅថាជា “អំពើឃោរឃៅនិងអមនុស្សធម៌”។

គួរបញ្ជាក់ថា អ្នកទាំងប្រាំបួនគឺស្ថិតក្នុងចំណោមមនុស្សជាង៦០នាក់ ដែលក្រុម Houthi ចោទប្រកាន់ពីបទ ជាប់ពាក់ព័ន្ធក្នុងការសម្លាប់លោក Saleh al-Samad កាលពីខែមេសាឆ្នាំ២០១៨។

ពួកគេត្រូវបានចោទប្រកាន់ពីបទធ្វើចារកម្មឲ្យសម្ព័ន្ធចម្រុះដឹកនាំដោយអារ៉ាប៊ីសាអ៊ូឌីត ដែលបានធ្វើសង្គ្រាមប្រឆាំងក្រុមឧទ្ទាមនេះ អស់រយៈពេលជាច្រើនឆ្នាំមកហើយ ក្នុងកិច្ចខិតខំប្រឹងប្រែងដើម្បីនាំរដ្ឋាភិបាលដែលទទួលស្គាល់ជាអន្តរជាតិរបស់យេម៉ែន ឲ្យឡើងកាន់អំណាចវិញ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ តាលីបង់ ធ្វើទារុណកម្មចាប់ដកក្រចកដៃ មុនពេលប្រហារជីវិតភ្នាក់ងារចារកម្ម អាហ្វហ្គានីស្ថាន