លោក ប្រាក់ សុខុន ៖ កម្ពុជា និងអាល្លឺម៉ង់ ទើបតែសម្រេចបានសេចក្តីប្រកាសរួមស្តីពីការពិគ្រោះយោបល់ទ្វេភាគី

លោកឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិកម្ពុជា កាលពីរសៀលថ្ងៃទី២៦ ខែមករា ម្សិលមិញ បានទទួលជួបសម្តែងការគួរសមពីលោកស្រី ភីត្រា ស៊ីគមឹន អគ្គនាយកទទួលបន្ទុកកិច្ចការអាស៊ី-ប៉ាស៊ីហ្វិក នៃក្រសួងការបរទេសអាល្លឺម៉ង់ ក្នុងអំឡុងពេលទស្សនកិច្ចនៅកម្ពុជា។

បន្ទាប់ពីជំនួបនោះ លោកឧបនាយករដ្ឋមន្រ្តី ប្រាក់ សុខុន បានអះអាងថា កម្ពុជា និងអាល្លឺម៉ង់ ទើបតែបានសម្រេចសេចក្តីប្រកាសរួមស្តីពីការពិគ្រោះយោបល់ទ្វេភាគី ដែលនឹងផ្តល់យន្តការសន្ទនាសម្រាប់ប្រទេសទាំងពីរ សំដៅបង្កើនការយោគយល់គ្នាទៅវិញទៅមក ជំរុញកិច្ចសហប្រតិបត្តិការ និងស្វែងរកកាលានុវត្តភាព ដែលអាចនាំមកនូវផលប្រយោជន៍ដល់ប្រជាជននៃប្រទេសទាំង២។

បើតាមលោកឧបនាយករដ្ឋមន្រ្តី ប្រាក់ សុខុន អាល្លឺម៉ង់ គឺជាមិត្តដ៏ល្អរបស់កម្ពុជា ជាពិសេសក្នុងការប្រយុទ្ធប្រឆាំងនឹងជំងឺរាតត្បាតកូវីដ-១៩។ ជាមួយគ្នានេះ លោកបានកោតសរសើរចំពោះការគាំទ្ររបស់រដ្ឋាភិបាល និងប្រជាជនអាល្លឺម៉ង់។ ទន្ទឹមនឹងនេះ អាស៊ាន បន្តវាយតម្លៃខ្ពស់ដល់ទំនាក់ទំនង និងការចូលរួមចំណែករបស់អាល្លឺម៉ង់ចំពោះតំបន់នេះ៕

អត្ថបទ ៖ កោះកែវ