ព័ត៌មានអន្ដរជាតិ

កាណាដាចូលរួមជាមួយ EU ក្នុងបញ្ហាប្រឈមជាមួយចិននៅWTO

បានផុស

៤ years មុន

នៅ

ថ្ងៃសុក្រ ១១ កុម្ភៈ ២០២២

ដោយ

ប្រទេសកាណាដានឹងចូលរួមជាមួយចក្រភពអង់គ្លេស សហរដ្ឋអាមេរិក និងអូស្ត្រាលីដើម្បីបញ្ចូលគ្នានូវការពិគ្រោះយោបល់ជាផ្នែកមួយនៃជម្លោះរបស់សហភាពអឺរ៉ុប (EU) ជាមួយប្រទេសចិននៅអង្គការពាណិជ្ជកម្មពិភពលោក (WTO) ជុំវិញបំរាមពាណិជ្ជកម្មដែលត្រូវបានចោទប្រកាន់របស់ទីក្រុងប៉េកាំងទៅលើប្រទេសលីទុយអានី។

ស្ថាប័នកិច្ចការសកលកាណាដាបាននិយាយក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ ទី១០ ខែកុម្ភៈថា ៖«កាណាដាព្រួយបារម្ភពីសកម្មភាពពាណិជ្ជកម្មថ្មីៗរបស់ចិនដែលបានដាក់លើលីទុយអានី ព្រមទាំងទំនិញ និងសេវាកម្មសហភាពអឺរ៉ុបជាមួយមាតិកាលីទុយអានី ដែលអាចបំផ្លាញដល់ប្រព័ន្ធពាណិជ្ជកម្មអន្តរជាតិដែលមានច្បាប់ជាមូលដ្ឋាន និងស្ថាប័នរបស់ខ្លួន»។

សហភាពអឺរ៉ុបជួបបញ្ហាប្រឈមនៅអង្គការពាណិជ្ជកម្មពិភពលោកដែលមានទីស្នាក់នៅទីក្រុងហ្ស៊ឺណែវកាលពីខែមករា ដោយបានចោទប្រកាន់ចិនពីបទរើសអើងការធ្វើពាណិជ្ជកម្មលើទុយអានីដែលខ្លួននិយាយថា ជាការគំរាមកំហែងដល់សុចរិតភាពទីផ្សារតែមួយរបស់ EU ។

ចិនបានកាត់បន្ថយទំនាក់ទំនងការទូតជាមួយលីទុយអានី និងដាក់សម្ពាធប្រជាជនជាច្រើនឲ្យផ្តាច់ទំនាក់ទំនងជាមួយប្រទេសដែលមានប្រជាជន២.៨លាននាក់ បន្ទាប់ពីប្រទេសមួយនេះបានអនុញ្ញាតឲ្យកោះតៃវ៉ាន់បើកស្ថានទូតនៅទីក្រុង Vilnius។

កាណាដាបាននិយាយថា ខ្លួនប្រឆាំងនឹងសេដ្ឋកិច្ចបង្ខិតបង្ខំ និងឈរជាមួយដៃគូដែលមានគំនិតដូចគ្នាក្នុងការគាំទ្រពាណិជ្ជកម្មអន្តរជាតិដែលយកច្បាប់ជាមូលដ្ឋានជាមួយអង្គការពាណិជ្ជកម្មពិភពលោក។

ចិនដែលបាននិយាយថា ជម្លោះជារឿងនយោបាយជាងសេដ្ឋកិច្ច និងបានដាក់ស្លាកសកម្មភាពរបស់ប្រទេសលីទុយអានីជាការប៉ុនប៉ងធ្វើឲ្យខូចទំនាក់ទំនងសហភាពអឺរ៉ុប-ចិន ដោយបានចាត់ទុកកោះតៃវ៉ាន់ដែលគ្រប់គ្រងខ្លួនឯងជាទឹកដីរបស់ខ្លួន។

ការប្រឈមនៅ WTO ទុកពេល៦០ថ្ងៃសម្រាប់ភាគីនានាដើម្បីដោះស្រាយ។ ប្រសិនបើដោះស្រាយមិនចេញទេ សហភាពអឺរ៉ុបអាចចាប់ផ្តើមជម្លោះផ្លូវការដែលនឹងបង្កើតគណកម្មការ WTO មួយសម្រាប់ការសិក្សាពីការទាមទាររបស់ខ្លួនជាមួយនឹងប្រទេសចិន៕

ប្រែសម្រួល៖ វីរបុត្រ
ប្រភព៖ Reuters