ប្រជ្រុយបុរស ៦កន្លែង នរវិទូជឿថា ជាកំណប់ជីវិត កម្ររកបាន

យោងតាមក្បួន​នរវិទ្យា ប្រសិនបុរស​ណាម្នាក់ ​​មាន​សំណាង​មាន​ប្រជ្រុយនៅលើទីតាំងមួយចំនួនដូចខាងក្រោម ពួកគេជាមនុស្សមាន​លាភ​សំណាង​ធំ មុខរបរ​តែង​មានការ​រីក​ចម្រើន​ជា​បន្តបន្ទាប់ ហើយនៅថ្ងៃអនាគត ពួកគេងាយក្លាយជាមនុស្សជោគជ័យជាទីបំផុត។

ប្រជ្រុយ នៅលើថ្ងាស

តាម​នរវិទ្យា ផ្ទៃ​ថ្ងាស​គឺ​ជា​កន្លែងតំណាង​នៃ​លាភ​សំណាង​របស់​សុភាព​បុរស​។ ដូច្នេះ​ប្រសិនបើ​ប្រជ្រុយ​លេចឡើង​នៅ​លើ​ថ្ងាស ​នោះមាន​ន័យ​ថា ពួកគេជាបុរស​កើត​មក​មាន​ជោគវាសនា​ល្អប្រសើរណាស់។

ភាគច្រើននៃបុរសដែលមានប្រជ្រុយដុះនៅតំបន់នេះ ជាមនុស្សកើតមកមានទេពកោសល្យជាច្រើន ព្រមទាំងមានឆន្ទៈខ្ពស់ក្នុងជីវិត និងមានបុគ្គលិកលក្ខណៈល្អជាច្រើនទៀត។ ដូច្នេះថ្ងៃអនាគតងាយក្លាយជាមនុស្សល្បី និងមានមុខតំណែងខ្ពស់ក្នុងសង្គម។

ប្រជ្រុយ នៅលើច្រមុះ

ក្រៅ​ពី​ថ្ងាស ​បើ​សុភាព​បុរស​ណា​សំណាង​មាន​ប្រជ្រុយ​ដុះ​លើ​ច្រមុះ​ក៏​ចាត់​ទុក​ជា​មនុស្ស​មាន​សំណាង និង​ទ្រព្យសម្បត្តិ​ដែរ។ ក្រៅពីនេះ ប្រជ្រុយដែលលេចត្រង់នេះ ក៏ជាប្រភពនាំមកនូវទ្រព្យសម្បត្តិ និងសម្បូរលុយចាយ។

​ជាពិសេសប្រសិនបើគេ​មាន​ប្រជ្រុយ​ក្រាស់ និង​ធំ នោះ​ពួកគេ​នឹង​ទទួលបាន​លាភ​សំណាង​កាន់តែច្រើន​។ សុភាពបុរសទាំងនេះភាគច្រើនពូកែខាងការងារទាក់ទងនឹងហិរញ្ញវត្ថុ ឬអាជីវកម្ម។ តាំង​ពី​វ័យ​កណ្តាល​ឡើង​ទៅ ជីវិត​របស់​ពួកគេមាន​ឱកាស​ច្រើន​ក្នុង​ការ​រីក​ចម្រើន ទ្រព្យ​សម្បត្តិ​ពិបាក​រត់ចោលគេណាស់។

ប្រជ្រុយ នៅលើជ្រុងនៃមាត់

តាម​នរវិទ្យាចារថា ប្រជ្រុយ​ដែល​លេច​នៅ​ជ្រុង​មាត់​​ត្រូវ​បាន​​ចាត់​ទុក​​ជា​ទីតាំង​​នាំ​សំណាង និង​ភាព​រុងរឿង​ដល់​សុភាព​បុរសដែលជាម្ចាស់។ មនុស្សទាំងនេះ ក្រៅតែពីអាជីពរីកចម្រើន ក៏មានទ្រព្យសម្បត្តិច្រើន ហើយមានអនាគតភ្លឺស្វាងទៀតផង។

ដោយសារសមត្ថភាពពីកំណើត និងមានសមត្ថភាពពហុជំនាញ រហ័សរហួន ដូច្នេះហើយពេលពេញវ័យ ពួកគេងាយនឹងជោគជ័យក្នុងវិស័យជាច្រើន ហើយអាជីពក៏គាប់ប្រសើរផងដែរ។ យ៉ាងណាមិញ ប្រសិនបើពួកគេមិនក្លាយជាមនុស្សដែលមានឋានៈខ្ពង់ខ្ពស់ ហើយត្រូវបានមនុស្សគ្រប់គ្នាគោរពទេនោះ ជីវិតរបស់ពួកគេក៏សម្បូរទៅដោយអ្នកមានជុំព័ទ្ធជួយផងដែរ។

ប្រជ្រុយ នៅក្រោមក ឬនៅខាងក្រោយក

ប្រជ្រុយដែលលេចឡើងនៅក្រោមកញ្ចឹងក ឬនៅខាងក្រោយកញ្ចឹងក ជាទីតាំងប្រជ្រុយរបស់សុភាពបុរសដែលមានឋានន្តរស័ក្តិល្អ កេរ្តិ៍ឈ្មោះក្រអូបសាយ និងអាជីពរុងរឿង។ ពេលគេធំឡើង តែងតែជោគជ័យក្នុងការងារ និងកាន់អំណាចច្រើនក្នុងដៃ។

ម្យ៉ាងវិញទៀត សុភាពបុរសដែលមានប្រជ្រុយនៅតំបន់នេះ ជាមនុស្សឆ្លាតវៃ ទៀងត្រង់ ម៉ឺងម៉ាត់ និងរឹងមាំផងដែរ។ ដូច្នេះហើយពួកគេតែងតែជោគជ័យឆាប់បំផុត។ លើសពីនេះ ពួកគេមានទេពកោសល្យក្នុងការដឹកនាំអ្នកដទៃ និងបញ្ចុះបញ្ចូលអ្នកដទៃ ដូច្នេះហើយពួកគេងាយនឹងជោគជ័យក្នុងអាជីព។

ប្រជ្រុយ នៅលើបាតដៃ

សុភាពបុរសដែលមានប្រជ្រុយដុះលើបាត ជាមនុស្សដែលមានសំណាងខ្លាំងណាស់ដែរ។ ពួកគេភាគច្រើន រហ័សរហួនខ្លាំង ហើយកើតមកមានជំនាញភាពជាអ្នកដឹកនាំ ដូច្នេះអនាគតងាយនឹងល្បី។ ពួកគេជាមនុស្សច្រើនតែពូកែចាប់យកឱកាសលុយ និងដឹងពីរបៀបចាយលុយយ៉ាងល្អ។ ឯជីវិត​របស់​ពួកគេ​ងាយ​នឹង​ក្លាយ​ជា​អ្នក​មានបំផុត។

ប្រជ្រុយ នៅលើប្រអប់ជើង

ដូចនៅលើបាតដៃ នរវិទ្យាជឿថា បុរសដែលមានប្រជ្រុយលេចឡើងនៅលើប្រអប់ជើង ជាមនុស្សមានជោគវាសនាសុភមង្គលតាំងពីកុមារភាពរហូតដល់ពេញវ័យ។ ពេលចាប់អាជីព សុភាពបុរសទាំងនេះងាយនឹងក្លាយជាអ្នកដឹកនាំគំរូ ជាទីគោរព និងស្រឡាញ់របស់មនុស្សជាច្រើន៕

អត្ថបទ៖ សន្យា

ចុចអាន៖ ប្រជ្រុយកម្រ ៤កន្លែង បុរាណចារមកជាមនុស្សមានលាភធំ

ចុចអាន៖ ប្រជ្រុយបុរសត្រង់កន្លែងទាំងនេះ បុរាណទស្សន៍ទាយបែបណា?