ជីវិតកម្សាន្ដ

បាត់ពីសិល្បៈមួយរយៈតាមពិតតារាសម្ដែង ស៊ីនឌី បែរមកសម្ងំបើកអាជីពមួយនេះវិញ

បានផុស

៤ years មុន

នៅ

ថ្ងៃអង្គារ ១៥ មីនា ២០២២

ដោយ

ភ្នំពេញ ៖ តារាសម្តែងល្បីឈ្មោះដែលលេចវត្តមានតាមរយៈខ្សែភាពយន្តខ្មែរជាច្រើនរឿងលោកស៊ីនឌីនា អំឡុងពេលមួយរយៈចុងក្រោយនេះត្រូវបានគេកត់ សម្គាល់ថាអាជីពសិល្បៈរបស់លោកហាក់មានភាពស្ងប់ស្ងាត់ជាងមុន។ ខណៈដែលមានប្រភពបង្ហើបថាបច្ចុប្បន្នលោក ស៊ីនឌី កំពុងសម្ងំបង្កើតអាជីពថ្មីយ៉ាងជោគជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមប្រភពលេចធ្លាយចេញពីរង្វង់អ្នកសិល្បៈជិតដិតជាមួយលោក ស៊ីនឌី បាននិយាយថា ថ្វីត្បិតអាជីពសិល្បៈតារារូបនេះហាក់ស្ងប់ស្ងាត់ខ្លះពិតមែន ប៉ុន្តែពេលនេះលោកកំពុងតែដំណើរការយ៉ាងរលូននូវការងារថ្មីៗដូចជាការបើកហាងសាឡនជាដើម។ ជាក់ស្តែងថ្មីៗនេះលោក ស៊ីនឌី បានចំណាយដើមទុនរាប់ម៉ឺនដុល្លារបើកហាងកែសម្ផស្សដែលមានឈ្មោះក្លារា(Clara Clinic)ស្ថិតនៅម្តុំស្ដុបស្ពានអាកាសផ្សារដីហុយផ្អើលអស់អ្នកសិល្បៈទៀតផង។

តារាសម្តែងលោក ស៊ីនឌី បានប្រាប់កម្ពុជាថ្មីឲ្យដឹងតាមរយៈបណ្តាញសង្គមហ្វេសប៊ុកថា បន្ទាប់ពីសិល្បៈ ត្រូវបានផ្អាកមួយរយៈអំឡុងបរិបទនៃជំងឺកូវូដ-១៩ គឺបច្ចុប្បន្នលោកកំពុងតែដំណើរការហាងថ្មីផ្ទាល់ខ្លួនពិតមែន។ លោកបន្តទៀតថាមូលហេតុដែលលោកសម្រេចចិត្តបើកClara Clinicនេះគឺដោយសារ តែការស្រលាញ់ចូលចិត្តផ្នែកកែសម្ផស្ស។

លោកបានសង្កត់ធ្ងន់ដែរថា វាមិនមែនជារឿងងាយស្រួលនោះទេនៅក្នុងបរិបទកូវីដមិនទាន់ស្ងាត់រលៀបទៅដែលលោកបើកអាជីវកម្មថ្មីនោះ តែលោកមិនអាចរង់ចាំបានទេគឺត្រូវតែធ្វើឲ្យចេញជារូបរាងឡើង ស្របពេលដែលហាងសាឡននិងសម្អាងការរបស់លោកបានប្រាក់ចំណូលគ្រាន់តែទប់ទល់ប៉ុណ្ណោះតាំងពីផ្ទុះកូវីដមក។

ជាមួយគ្នានេះលោកក៏បានរម្លឹកពីប្រវតិ្តរបស់លោកផងដែរថា លោកធ្លាប់បានសិក្សានៅសកលវិទ្យាល័យភូមិន្ទវិចិត្រសិល្បៈផ្នែករបាំព្រះរាជទ្រព្យ ហើយក្រោយមកលោកបានឈានមកសម្ដែងភាពយន្ដបានខ្ទង់ជាង១០រឿងក៏ផ្អាកវិញ ដោយសារតែមហាញឹកជាមួយមុខជំនួញនាពេលសព្វនេះ។ យ៉ាងណាមិញលោកថា ចិត្តនៅតែស្រលាញ់ដកជាប់សិល្បៈជានិច្ចគ្រាន់តែពេលនេះលោកបានឈានជំហានថ្មីមកបង្កើតអាជីវកម្មដែលទាក់ទងសិល្បៈនៃការតុបតែងមុខវិញម្ដង៕

ដោយ ៖ ចាន់រ៉ា