សម្ដេចតេជោ ៖ មិនថាតែរុស្ស៊ីនោះទេ ប្រទេសណាក៏ដោយ ឲ្យតែឈ្លានពានប្រទេសមួយទៀត គឺកម្ពុជាប្រឆាំងជានិច្ច

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា មិនថាតែប្រទេសរុស្ស៊ីនោះទេ ប្រទេសណាក៏ដោយ ឲ្យតែឈ្លានពានប្រទេសមួយទៀត គឺប្រទេសកម្ពុជាប្រឆាំងជានិច្ច។

សម្ដេចតេជោ ហ៊ុន សែន បានថ្លែងនៅក្នុងពិធីសម្ពោធដាក់ដំណើរការ អគារជំងឺត្រចៀក ច្រមុះ បំពង់កមិត្តភាពកម្ពុជា-កូរ៉េ ក្នុងមន្ទីរពេទ្យព្រះអង្គឌួង នាព្រឹកថ្ងៃទី ២៨ ខែមីនានេះថា នៅថ្ងៃនេះ សម្ដេចត្រូវចេញមុខបញ្ជាក់ ជូនប្រជាពលរដ្ឋខ្មែរឲ្យបានដឹងច្បាស់ គឺការដែលប្រទេសកម្ពុជា បានបោះឆ្នោតប្រឆាំងការឈ្លានពានរបស់ប្រទេសរុស្ស៊ី ទៅលើប្រទេសអ៊ុយក្រែន។

បើតាមសម្ដេចតេជោ ហ៊ុន សែន​ គឺប្រទេសកម្ពុជា បានបោះឆ្នោតចំនួនពីរលើក ហើយមិនមែនជាការបោះឆ្នោត ក៏ប៉ុន្តែប្រទេសកម្ពុជា ថែមទាំងឈរជាឋានៈCo-Sponsor ឬក៏សហស្ថាបនិកនៃសេចក្ដីសម្រេចចិត្ត នៃមហាសន្និបាតអង្គការសហប្រជាជាតិ។

សម្ដេចតេជោនាយករដ្ឋមន្ត្រី បានលើកឡើងដែរថា បុគ្គលដែលមានសិទ្ធិនិយាយជាផ្លូវការបាន សម្រា​ប់នយោបាយការបរទេស តំណាងឲ្យប្រទេសកម្ពុជា គឺក្រៅពីព្រះមហាក្សត្រ មាននាយករដ្ឋមន្ត្រី និងក្រសួងការបរទេស ដោយមិនអាចយកអ្នកណាផ្សេង មកធ្វើអត្ថាធិប្បាយគោលជំហរជំនួយសបានទេ។

បើតាមសម្ដេចតេជោ ហ៊ុន សែន កាលពីពេលថ្មីៗនេះ មានការលើកឡើងថា កម្ពុជាបោះឆ្នោតប្រឆាំងរុស្ស៊ី មានហេតុផលចំនួន ៤ គឺ ទី១. កម្ពុជាមិនទាន់មាននាវាមុជទឹក, ទី២. កម្ពុជាមិនទាន់មានយន្ដហោះម៉េច សម្រាប់ទម្លាក់គ្រាប់បែក, ទី៣. កម្ពុជាមិនទាន់មានកាតព្វកិច្ចយោធា, ទី៤. កងទ័ពកម្ពុជាសម្បូរទៅដោយឧត្ដមសេនីយ៍ ដែលក្បាលពោះធំជាដើម។ ត្រង់ចំណុចនេះ ពួកគេចង់សំដៅថា បើប្រសិនកម្ពុជាមានអាវុធទំនើប កម្ពុជានឹងបោះឆ្នោតគាំទ្ររុស្ស៊ី។  

ប៉ុន្តែសម្ដេចតេជោនាយករដ្ឋមន្ត្រី បានថ្លែងបញ្ជាក់ថា »ខ្ញុំសូមបញ្ជាក់កម្ពុជាប្រកាន់ជំហរជាគោលការណ៍ មិនថាតែរុស្ស៊ីទេ ប្រទេសណាក៏ដោយដែលឈ្លានពានប្រទេសមួយទៀត កម្ពុជាប្រឆាំងជានិច្ចៗ»។ ជាមួយគ្នានេះសម្ដេចតេជោ ហ៊ុន សែន បានលើកឡើងបន្ថែមថា ប្រទេសរុស្ស៊ី ជាមិត្តរបស់កម្ពុជា ដែលធ្លាប់ជួយ និងមានទំនាក់ទំនងល្អជាមួយប្រទេសកម្ពុជា តាំងពីទស្សវ​ត្សរ៍ ៥០ រហូតមក។ ក៏ប៉ុន្តែរុស្ស៊ី បានឈ្លានពានអ៊ុយក្រែន ដែលមិនមែនគ្រាន់តែជាការជួយត្រឹមតែសាធារណរដ្ឋ ដូណេត និងឡូហាន់ តែបានវាយចូលដល់ទីក្រុងថែមទៀត។

សម្ដេចតេជោនាយករដ្ឋមន្ត្រី បានបញ្ជាក់បន្ថែមថា សកម្មភាពឈ្លានពានបែបនេះ កម្ពុជាមិនអាចទទួលយកបាន ហើយក៏មិនអាចអព្យាក្រឹត្យបានដែរ។ សម្ដេចតេជោ ហ៊ុន សែន បានបន្ថែមទៀតថា «ថ្ងៃក្រោយ បើសិនជាប្រទេសណាមួយ ធ្វើឥរិយាបថបែបនេះមកលើកម្ពុជា តើកម្ពុជាត្រូវទៅពឹងពាក់អ្នកណា យើងអនុវត្តនូវនយោបាយការបរទេស ផ្អែកលើច្បាប់ៗ ផ្អែកលើកធម្មនុញ្ញអង្គការសហប្រជាជាតិ យើងមិនមែនអនុវត្តនយោបាយ ការបរទេសផ្អែកទៅលើកម្លាំងនោះទេ»៕

អត្ថបទ៖​ ឃួន សុភ័ក្រ