ព័ត៌មានជាតិ

របាំប្រជាប្រិយ ពេញនិយមទាំងចាស់ទាំងក្មេងតាំងពីស្រុកចម្ការរហូតដល់ក្រុង

បានផុស

៤ years មុន

នៅ

ថ្ងៃព្រហស្បតិ៍ ៧ មេសា ២០២២

ដោយ

ក្នុងទស្សនៈខ្មែរជំនាន់មុន “ របាំប្រជាប្រិយ” គឺសំដៅលើរបាំទាំងឡាយដែល នៅជាប់ជាមួយនឹងប្រជាជន ហើយលេងកម្សាន្តដោយអ្នកស្រុក។ ឧទាហរណ៍ ដូចជារបាំត្រុដិ, របាំស្នែងទន្សោង, របាំគោះអង្រែជាដើម។ ប៉ុន្តែនៅពេលមានរបាំថ្មីចូលមក គេក៏ត្រឡប់ទៅហៅរបាំទាំងអម្បាលមាណដែលរៀបរាប់មកនេះ ជា “របាំប្រពៃណី” ហើយហៅរបាំថ្មីដែលទើបចូលមកថា “របាំប្រជាប្រិយ វិញ។ ម្ល៉ោះហើយសព្វថ្ងៃ (ច្រើនតែក្នុងចំណោមអ្នកសិក្សា) ដែលហៅថារបាំប្រជាប្រិយនោះ គឺសំដៅតែទៅលើរបាំរាំវង់, រាំក្បាច់, សារ៉ាវ៉ាន់, ឡាំលាវ, តាលុង, ប្រឹន និងចូកកំពឹសប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាំទាំងអស់នេះសព្វថ្ងៃ មានការពេញនិយមបំផុតក្នុងចំណោមប្រជាជនទាំងចាស់ក្មេងស្រីប្រុសរាប់តាំងពីរាស្រ្តដល់ព្រះមហាក្សត្រ និងតាំងពីស្រុកស្រែរហូតដល់ក្រុង ដ្បិតជារបាំដែលងាយចេះចាំ មិនរើសសម្លៀកបំពាក់ ទីកន្លែង និងពេលវេលា។ របាំប្រជាប្រិយគេច្រើនរាំ លេងក្នុងពិធីសប្បាយផ្សេងៗដូចជា៖ ពិធីរៀបមង្គលការ, ពិធីជប់លៀង, ពិធីជួបជុំញាតិមិត្តជិតឆ្ងាយ ជាពិសេសក្នុងពិធីបុណ្យចូលឆ្នាំខ្មែរ។ ពីមុនភ្លេងសម្រាប់រាំរបាំប្រជាប្រិយ ជាពិសេសរបាំរាំវង់ គឺមានតែស្គរ១ និងត្រឡោកមួយគូរ (ដោយមានចោះរន្ធដាក់គ្រាប់ត្រួសតូចៗខាងក្នុងសម្រាប់ក្រឡុកបន្លឺជាចង្វាក់) ប៉ុណ្ណោះ។ ប៉ុន្តែសព្វថ្ងៃ ភ្លេងសម្រាប់កំដររបាំប្រជាប្រិយ គឺជាប្រភេទភ្លេងសម័យរបស់បស្ចិមប្រទេស ឬប្រើម៉ាស៊ីននិងឧបករណ៍បំពងសំឡេង មានម៉ាញ៉េ, ម៉ាស៊ីនចាក់ថាស និងធុងបាសជាដើម។

កន្លងទៅក៏មានការប្រទាំងប្រទើសគ្នាលើរបាំប្រជាប្រិយមួយចំនួន ពាក់ព័ន្ធប្រភពកកើតដំបូង។ ក្រៅពីរាំវង់ រាំក្បាច់ ដែលជារបាំមូលដ្ឋានរបស់ជនជាតិខ្មែរ មានចំរៀងនិងរបាំប្រឺន និងកន្រ្ទឹមដែលមានប្រជាប្រិយភាពដ៏ធំធេងនៅតំបន់ចំនៀរភ្នំដងរែក នៅមានរបាំ “ឡាំលាវ” និង “សារ៉ាវ៉ាន់ថែមទៀត ដែលមានប្រជាប្រិយភាពធំធេង ហើយមានការនិយមរាំឆ្លូតគ្នាជាមួយរាំវង់ និងរាំក្បាច់ជានិច្ច។

ចំពោះរបាំឡាំលាវ ដែលមានចង្វាក់ញាប់រន្ថើន និងរបាំក្បាច់សារ៉ាវាន់នេះ ជនជាតិខ្មែរមួយចំនួនច្រឡំថាជារបាំប្រជាប្រិយខ្មែរ។ បើយោងតាមឯកសារទស្សនីយភាពខ្មែរដែលចងក្រងដោយគណៈកម្មការស្រាវជ្រាវសិល្បៈវប្បធម៌បោះពុម្ភនៅឆ្នាំ២០០៣ បានបញ្ជាក់ថា របាំឡាំឡាវ និងសារ៉ាវ៉ាន់មានប្រភពមកពីប្រទេសឡាវ។ របាំឡាំឡាវ និងសារ៉ាវ៉ាន់ពិតជាឥទ្ធិពលរបស់សិល្បៈលាវ ដែលបានហូរចូលមកប្រទេសកម្ពុជា ហើយដែលត្រូវបានជនជាតិខ្មែរនិយមរាប់អានយ៉ាងក្រៃលែង។ ដូច្នេះខ្មែររាំឡាំលាវមានន័យថាខ្មែររាំបែបលាវ ឬចំឡងរបៀបរាំតាមជនជាតិលាវ ថ្វីត្បិតតែមិនចម្លងឲ្យដូចគ្នាបេះបិទឬក៏ដូចលាវបេះបិទក្តី។ ឯសារ៉ាវាន់វិញគឺជាឈ្មោះខេត្តមួយជាប់នឹងខេត្តអាត់តៈពើ ហើយដែលស្ថិតមិនឆ្ងាយប៉ុន្មានពីខេត្តស្ទឹងត្រែងរបស់ប្រទេសកម្ពុជា។ ក្បាច់សារ៉ាវ៉ាន់នេះក៏ជាភស្តុតាងបញ្ជាក់ថា មានប្រភពមកពីខេត្តសារ៉ាវ៉ាន់នេះឯង៕

អត្ថបទ៖ ប៊ុណ្ណារ៉ា

Related Topics:ទស្សនីយភាពសិល្បៈខ្មែរ