អ្នកឡើងត្នោតអាចរកប្រាក់បានជិត២០មុឺនរៀលក្នុងមួយថ្ងៃ

ពិតជាមិនធម្មតាដែលលោកតាវ័យ៦០ឆ្នាំបានសម្រេចចិត្តចាកចេញពីស្រុកកំណើតមកជួលដើមត្នោតគេឡើងបានទឹកត្នោតលក់ក្នុងមួយថ្ងៃៗបានជិត២០មុឺនរៀល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្តែងនៅព្រឹកថ្ងៃទី១៦ ខែឧសភា នេះ កម្ពុជាថ្មី បានជួបជាមួយលោកតា ផេង ក្រឹង អាយុ៦០ឆ្នាំមានស្រុកកំណើតភូមិគោករវៀង ឃុំគោករវៀង ស្រុកជើងព្រៃ ខេត្តកំពង់ចាម បានឲ្យដឹងថា សព្វថ្ងៃនេះលោកតាបានមកជួលដើមត្នោតរបស់ប្រជាពលរដ្ឋក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ចំនួន១៥ដើម ដើម្បីកៀបយកទឹកលក់ហើយជាលទ្ធផលគឺទទួលបានយ៉ាងល្អ ហើយទឹកត្នោតមានរស់ជាតិផ្អែមឆ្ងាញ់និងមានម៉ូយចាំទិញយកទៅពិសារដោយមិនចាំបាច់ដើរលក់ចេញឆ្ងាយពីកន្លែងដែលតាជួលដើមត្នោតគេឡើងនោះឡើយ។

លោកតាបានបញ្ជាក់ថា ជាមធ្យមលោកតាឡើងកៀបផ្កាត្នោតទាំង១៥ដើមបានទឹកប្រមាណជា៦០លីត្របើពីមុនមកក្នុងមួយថ្ងៃជិត១០០លីត្រឯណោះ។ ចំពោះតម្លៃទឹកត្នោតដែលលក់ឲ្យម៉ូយវិញ គឺទឹកត្នោតផ្អែម១លីត្រថ្លៃ៤០០០រៀល ឯទឹកត្នោតជូបានត្រឹម៣០០០រៀលប៉ុណ្ណោះ។ ហើយបើគឹតជាលក់ចេញវិញគឹទឹកត្នោតផ្អែមលក់ដាច់ជាង។

លោកតា ផេង ក្រឹង បានបញ្ជាក់ថា ទឹកត្នោតលោកតាគ្មានលាយទឹកអង្ករដូចពាក្យចចាមអារ៉ាមនាំគ្នានិយាយឡើ ព្រោះអ្នកដែលទិញយកទៅពិសារមិនដែលត្អូញថាឈឺពោះដូចទឹកត្នោតដែលគេលាយផ្តេសផ្តាសនោះឡើយ។ អញ្ចឹងហើយទើបលោកតាអាចទទួលបានកម្រៃពីការលក់ជាប្រចាំថ្ងៃយ៉ាងតិច២០មុឺនរៀលដែរ។ ហើយលោកតាក៏មិនអាចបំភ្លេចគុណម៉ូយដែលជួយទិញទឹកត្នោតរបស់លោកតារាល់ថ្ងៃនេះផងដែរ៕

អត្ថបទ៖ នរា