អង់គ្លេស ត្រៀមបញ្ជូននាវាចម្បាំងទៅ អ៊ុយក្រែន

ចក្រភពអង់គ្លេស ​កំពុង​សហការ​ជាមួយ​សម្ព័ន្ធមិត្ត ​លើ​ផែនការ​ដ៏មាន​សក្ដានុពល​ ក្នុងការ​បញ្ជូន​នាវាចម្បាំង​ទៅកាន់​កំពង់ផែ​សមុទ្រ​ខ្មៅ Odesa ដើម្បី​ផ្តល់​ការការពារ ​ដល់​កប៉ាល់​ដែល​នាំចេញ​គ្រាប់ធញ្ញជាតិ​អ៊ុយក្រែន។

រដ្ឋមន្ត្រីការបរទេសលីទុយអានី លោក Gabrielius Landsbergis បាននិយាយកាលពីថ្ងៃចន្ទទី២៣ខែឧសភាថា លោកបានពិភាក្សាអំពីការបង្កើតច្រករបៀងការពារបែបនេះ ពីកំពង់ផែ Odesa ជាមួយរដ្ឋមន្ត្រីការបរទេសអង់គ្លេសលោកស្រី Liz Truss។

លោកក៏បាននិយាយដែរថា “សម្ព័ន្ធឆន្ទៈ” ដែលបង្កើតឡើងដោយសមាជិកណាតូ និងប្រទេសពឹងផ្អែកលើគ្រាប់ធញ្ញជាតិផ្សេងទៀតដូចជាអេហ្ស៊ីប ប្រហែលជាមានឆន្ទៈក្នុងការប្តេជ្ញាចិត្តលើធនធានយោធា ដើម្បីពង្រឹងការការពារ និងទប់ស្កាត់កង្វះខាតស្បៀងអាហារដែលកំពុងរីករាលដាល។

សម្រាប់ផែនការនេះ កងនាវាចរសម្ព័ន្ធមិត្ត នឹងត្រូវបោសសម្អាតតំបន់ជុំវិញកំពង់ផែភាគខាងត្បូង មុនពេលការពារកប៉ាល់ដឹកទំនិញ ដែលផ្ទុកផលិតផលសំខាន់ៗ។

មីស៊ីល​រយៈ​ចម្ងាយ​ឆ្ងាយ ​ក៏​នឹង​ត្រូវ​ដាក់​ពង្រាយផងដែរ ​ដើម្បី​រារាំង​រាល់​ការ​ប៉ុនប៉ង​​បំផ្លិចបំផ្លាញ​ច្រករបៀងពីសំណាក់ប្រទេស រុស្ស៊ី។

ការលុកលុយរបស់រុស្ស៊ី លើអ៊ុយក្រែន បានធ្វើឲ្យពិភពលោកធ្លាក់ចូលទៅក្នុង វិបត្តិស្បៀងអាហារបន្តិចម្តងៗ ដោយគ្រាប់ធញ្ញជាតិ និងទំនិញសំខាន់ៗយ៉ាងច្រើនផ្សេងទៀត ត្រូវជាប់នៅក្នុងស្តុក ខណៈសង្រ្គាមនៅតែបន្ត។

គួរបញ្ជាក់ថា អ៊ុយក្រែន និងរុស្ស៊ី បាននាំចេញអង្ករ និងស្រូវសាលី មួយភាគបីរបស់ពិភពលោក។ អ៊ុយក្រែន ក៏នាំចេញប្រេងផ្កាឈូករ័ត្នដ៏ធំផងដែរ ខណៈរុស្ស៊ីគឺជាអ្នកផ្គត់ផ្គង់ជីកំពូល៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ប្រមុខចារកម្មយោធាអ៊ុយក្រែនអះអាងថា លោក ពូទីន រួចជីវិតពីការប៉ុនប៉ងធ្វើឃាត