អភិបាល​ខេត្ត​ព្រៃវែង ស្នើពលរដ្ឋ​បើកបរ​គោយ​ន្ត​ប្រើ​កង់ជ័រ កុំ​ប្រើ​កង់ដែក​​នាំ​ឲ្យ​ផ្លូវ​ឆាប់​ខូច

លោក ជា សុមេធី អភិបាលខេត្តព្រៃវែងសំណូមពរឲ្យប្រជាពលរដ្ឋជួយថែរក្សាផ្លូវថ្នល់​ កុំបើកបរ​គោយន្កប្រើ​កង់​ដែក​​ដែល​នាំ​ឲ្យ​ផ្លូវ​ឆាប់​ខូច។

ខណៈ​ចូលរួម​បើក​ការដ្ឋាន​សាងសង់​ផ្លូវ​ប្រវែង​ ៤ ០០០ ម៉ែត្រ​នៅ​ឃុំព្រែកតាសរ ស្រុកពោធិ៍រៀង កាលពីពេលថ្មីៗ​នេះលោកអភិបាល​ខេត្ត​បាន​ឲ្យ​ដឹង​ថា កន្លងទៅ​បង​ប្អូន​ពលរដ្ឋ​មួយ​ចំនួនបើកបរ​គោយន្ត​ដោយ​ប្រើ​កង់ដែក នាំ​ឲ្យ​ផ្លូវ​ឆាប់​ខូច​ទៅវិញ​នៅពេលស្ថាបនា​រួច។ លោកបាន​ស្នើ​សុំ​ជំនួស​ដោយការ​ប្រើប្រាស់​គោយន្ត​កង់​ជ័រ​ ដើម្បី​ធានា​ផ្លូវថ្នល់​ប្រើប្រាស់​បាន​យូរ​ឆ្នាំ។

លោក យស ស៊ីណាត អភិបាលស្រុកពោធិ៍រៀង​បាន​ឲ្យ​ដឹងថា ផ្លូវ​ដែល​ស្ថាបនា​នេះ​មាន​ប្រវែង ៤,០០០ ម៉ែត្រ ចាប់ពីភូមិព្រែកតាសរ មកដល់ភូមិព្រែកក្រូច ស្ថិតនៅក្នុងឃុំព្រែកតាសរ ស្រុកពោធិ៍រៀង។

លោក យស ស៊ីណាតបញ្ជាក់ថា តាមរយៈ​សមិទ្ធផល​ផ្លូវ​ដែលស្ថាបនា​នេះ​បញ្ជាក់ឱ្យឃើញយ៉ាងច្បាស់ពី​ការយកចិត្តទុកដាក់ គិតគូររបស់ថ្នាក់ដឹកនាំរាជរដ្ឋាភិបាល ដែលជានិច្ចកាលរួមសុខរួមទុក្ខជាមួយប្រជាជននៅគ្រប់កាលៈទេសៈ ហើយ​បាន​ចូលរួមដោះស្រាយរាល់សំណូមពរ និងសេចក្តីត្រូវការរបស់ប្រជាជនទាំងផ្នែកពុទ្ធចក្រ និង ផ្នែកអាណាចក្របានជាបន្តបន្ទាប់។

កន្លងទៅនេះ​ ក្នុង​ស្រុក​ពោធិ៍​រៀង​ទទួលបាន​សមិទ្ធផលជាច្រើន ក្នុងវិសយ័គមនាគមន៍ជនបទ (មានផ្លូវ និង ស្ពាន) ដែលបានសាងសង់រួច និងសម្ពោធ ដាក់អោយប្រើប្រាស់នាឆ្នាំកន្លងមក និង សមិទ្ធិផលថ្មីៗទើបចាប់ផ្តើមដំណើរការនិងកំពុងសាងសង់ជាបន្តបន្ទាប់រួមមាន៖
១-ផ្លូវក្រាលគ្រួសក្រហម ចាប់ពីចំណុចឃុំកំពុងប្ញស្សី ទៅឃុំព្រែកជ្រៃ មានប្រវែង ៩,៣០០ម៉ែត្រ ខ្នងលើ ១០ម៉ែត្រ និងស្ពានចំនួន ០២កន្លែង ប្រវែង ៩០ម៉ែត្រ ខ្នងលើ ៨ម៉ែត្រ។សៅគ្រី
២-ផ្លូវក្រាលគ្រួសក្រហម ចាប់ពីចំណុចឃុំពោធិ៍រៀង ទៅឃុំព្រៃកន្លោង មានប្រវែង ៩,៥០០ម៉ែត្រ ខ្នងលើ ៦ម៉ែត្រ និងស្ពានចំនួន ០១កន្លែង ប្រវែង ១៧២ ម៉ែត្រ ខ្នងលើ ៨ម៉ែត្រ។
៣-ផ្លូវក្រាលគ្រួសក្រហម ចាប់ពីចំណុចឃុំពោធិ៍រៀង ទៅឃុំព្រែកអន្ទះមានប្រវែង ៩,០០០ម៉ែត្រ ខ្នង ១០ម៉ែត្រ និងស្ពានចំនួន ០២កន្លែង ប្រវែង ១០១ម៉ែត្រ ខ្នងលើ ១០ម៉ែត្រ។
៤-ផ្លូវក្រាលគ្រួសក្រហម ស្ថិតនៅភូមិព្រែកផ្ដាំ និងភូមិតាមែង ឃុំព្រែកអន្ទះ មានប្រវែង ២,៥៥០ម៉ែត្រចែកចេញជាពីរខ្សែ ខ្សែទី១ ស្ថិតនៅចំណុចភូមិព្រែកផ្តាំ ប្រវែង ៥៥០ម៉ែត្រ ខ្នងលើ ៦ម៉ែត្រ -ខ្សែទី២ ស្ថិតនៅភូមិពាមែង ប្រវែង ២,០០០ម៉ែត្រ ខ្នងលើ ៥ម៉ែត្រ។
៥-ផ្លូវក្រាលគ្រួសក្រហម ចាប់ពីចំណុចឃុំកំពង់ប្រាំងស្រុកពារាំង ទៅឃុំព្រែកអន្ទះមានប្រវែង ១៣,៦៤០ ម៉ែត្រ ខ្នងលើ៨ម៉ែត្រ និងស្ពានចំនួន ០៥កន្លែង ប្រវែង ១៧៦ម៉ែត្រ ខ្នងលើ ៧ម៉ែត្រ។
៦-ផ្លូវក្រាលគ្រួសក្រហម ចាប់ពីចំណុចឃុំព្រៃកន្លោង ទៅឃុំពពីស ស្រុកស្វាយអន្ទរ មានប្រវែង ៦,៥០០ម៉ែត្រ ខ្នងលើ៨ម៉ែត្រ ។

ក្នុងខ្សែផ្លូវខាងលើនេះ ក៍បានប្រែក្លាយពីផ្លូវក្រាលគ្រួសក្រហមទៅជាប្រភេទផ្លូវក្រាលកៅស៊ូ DBST ដែលបានសាងសង់រួចដូចខាងក្រោម៖
-ផ្លូវកៅស៊ូ DBST ឃុំព្រៃកន្លោង ទល់ឃុំពពឹស ស្រុកស្វាយអន្ទរ ប្រវែង ៦,៥០០ម៉ែត្រ ខ្នងលើ ៦ម៉ែត្រ
-ផ្លូវកៅស៊ូ DBST ឃុំព្រៃស្នៀតស្រុកពារាំង ទល់ឃុំកំពង់ឫស្សី ប្រវែង ១,៧០០ម៉ែត្រ ខ្នងលើ ៧ម៉ែត្រ
-ផ្លូវកៅស៊ូ DBST ឃុំកំពង់ប្រាំងស្រុកពារាំង ទល់ឃុំព្រែកតាសរ ប្រវែង ៦,៣៨០ម៉ែត្រ ខ្នងលើ ៦ម៉ែត្រ ខ ផ្លូវ ស្ពាន ចាប់ផ្តើម និង កំពុងសាងសង់
-ផ្លូវកៅស៊ូ DBST ឃុំព្រៃកន្លោង ទល់ឃុំពោធិ៍រៀង ប្រវែង ៩,៥០០ម៉ែត្រ ខ្នងលើ ៦ម៉ែត្រ -ផ្លូវកៅស៊ូ DBST ឃុំកំពង់ប្ញស្សី ទល់ឃុំពោធិ៍រៀង ប្រវែង ៧,៤០០ម៉ែត្រ ខ្នងលើ ៧ម៉ែត្រ
-ស្ពានវត្តព្រែកផ្ដាំ ប្រវែង ៦០ម៉ែត្រ ខ្នងលើ ១០ម៉ែត្រ
-ផ្លូវ បេតុង មួយខ្សែ ស្ថិតនៅភូមិព្រែកតាសរ ដល់ភូមិព្រែកក្រូច ឃុំព្រែកតាសរទល់ឃុំព្រែកអន្ទះ ប្រវែង ៤,០០០ម៉ែត្រ ខ្នងលើ ៧ម៉ែត្រ ដែលកំពុងបើកការដ្ឋានសាងសង់ នាឱកាសនេះ៕

អត្ថបទ៖ សៅគ្រី