ព័ត៌មានជាតិ

អាហារនិងគ្រឿងបរិភោគនៅផ្សារបន្ទាយស្រី គ្មានសារធាតុគីមីអ្វីឡើយ ក្រោយការចុះត្រួតពិនិត្យ

បានផុស

៥ years មុន

នៅ

ថ្ងៃពុធ ២៣ ធ្នូ ២០២០

ដោយ

សមត្ថកិច្ចជំនាញនៅតែបន្តចុះត្រួតពិនិត្យម្ហូបអាហារនិងគ្រឿងទេស នៅតាមផ្សារទូទាំង ខេត្តសៀមរាប ប៉ុន្តែជាលទ្ធផលមិនបានរកឃើញអ្វីខុសប្រក្រតី ឬមានសារធាតុគីមីអ្វីនោះឡើយ។

ជាក់ស្តែងនៅក្នុងឆ្នាំ២០២០នេះ កម្លាំងសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ខេត្តសៀមរាប ដែលដឹកនាំដោយលោកលឹម វុឌ្ឍីអនុប្រធានសាខា បានឲ្យដឹងថា ក្នុងអំឡុងពេលនៃការចុះត្រួតពិនិត្យគុណភាព សុវត្ថិភាព និង ម្ហូបអាហារ នៅក្នុងផ្សារបន្ទាយស្រី ក្នុងស្រុកបន្ទាយស្រី កាលពីរសៀលថ្ងៃទី២២ ខែធ្នូ ឆ្នាំ២០២០នេះ មន្ត្រីជំនាញយើង ពុំបានរកឃើញសារធាតុគីមីហាមឃាត់ និងភាពមិនអនុលោមណាមួយ នៅលើម្ហូបអាហារនិងគ្រឿងឧបភោគបរិភោគឡើយ បន្ទាប់ពីបានធ្វើការពិសោធន៍លើម្ហូបអាហារមួយចំនួនរួមមាន៖ ប្រភេទស្ពៃជ្រក់, ប្រភេទប្រហុក, សណ្ដែកបណ្ដុះ, តៅហ៊ូ និង បាញ់កាញ់ ជាដើម។

លោក លឹម វុឌ្ឍី មានប្រសាសន៍ទៀតថា ទោះជាយ៉ាងនេះក្ដី ក៏មន្ត្រីជំនាញ នៅតែបន្ដធ្វើការណែនាំដល់អាជីវករទាំងអស់ ឲ្យបានយល់ដឹង និងអនុវត្តទៅតាមច្បាប់ស្ដីការគ្រប់គ្រងគុណភាព សុវត្ថិភាព លើផលិតផលទំនិញ និងសេវា ព្រមទាំងច្បាប់កិច្ចការពារអ្នកប្រើប្រាស់ ជៀសវាងបង្កផលប៉ះពាល់ដល់សុខភាពប្រពលរដ្ឋ និងអាចប្រឈមចំពោះមុខច្បាប់ផងដែរ។

សូមបញ្ជាក់ថា នៅក្នុងឆ្នាំ២០២០នេះ មន្ត្រីសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំខេត្ត បានចុះទៅតាមទីផ្សារនានា ដើម្បីស្វែងរកភាពមិនអនុលោមផ្នែកសុវត្ថិភាពម្ហូបអាហារចំនួន ១៨លើក ដោយបានធ្វើការដកហូតទំនិញ ដែលមានភាពមិនត្រឹមត្រូវ បានចំនួន ១១៧,៨៣គីឡូក្រាម ប៉ុន្តែក្នុងចំនួននេះ បើប្រៀបធៀបទៅនឹងឆ្នាំ២០១៩ គឺមានការថយចុះ៕

អត្ថបទ៖ គឿនវេត

សូមចុចអាន៖ លែងធ្វើស្រែពឹងមេឃ ប្រជាជន ៣ ស្រុកនៅខេត្តកំពង់ឆ្នាំងបាន ប្រឡាយបេតុងរាប់រយគីឡូម៉ែត្រ ទាញទឹកធ្វើកសិកម្ម