ឈឺ កជាងមួយឆ្នាំ ពេលទៅពិនិត្យឃើញរឿងមិននឹកស្មានដល់ (មានវីដេអូ)

គ្រូពេទ្យបានយកឈ្លើងជញ្ជក់ឈាមចេញពីបំពង់ខ្យល់របស់ក្មេងប្រុសតូចម្នាក់បន្ទាប់ពីរូបគេឈឺបំពង់កអស់រយៈពេលជាងមួយឆ្នាំមកហើយ។

ក្មេងប្រុសអាយុ៥ឆ្នាំមកពីទីក្រុង Lincang ភាគខាងត្បូងប្រទេសចិនបានត្អូញត្អែរអំពីការឈឺបំពង់ករ៉ាំរ៉ៃ ដកដង្ហើមខ្លីនិងស្រមុកខ្លាំងនៅពេលយប់។

នៅពេលទទួលការព្យាបាលលើកចុងក្រោយនៅមន្ទីរពេទ្យក្នុងតំបន់មួយ គ្រូពេទ្យបានរកឃើញឈ្លើងនៅជាប់ក្នុងបំពង់ករបស់ក្មេងប្រុសនោះ។

វីដេអូនៅខាងក្នុងបន្ទប់វះកាត់បានបង្ហាញវេជ្ជបណ្ឌិតនិងបុគ្គលិកពេទ្យស៊កឧបករណ៍មួយចូលក្នុងបំពង់ករបស់ក្មេងប្រុសមុនពេលពួកគេដកឈ្លើងប្រវែងជាង៧សង់ទីម៉ែត្រចេញ។

ប៉ារ៉ាស៊ីតមានជីវិតនេះត្រូវបានគេឃើញមានចលនា ភ្លាមៗនៅពេលវាត្រូវបានយកចេញពីរាងកាយរបស់ក្មេងប្រុស។

វេជ្ជបណ្ឌិតបានណែនាំថា ឈ្លើងនេះប្រហែលជាចូលក្នុងបំពង់ខ្យល់របស់ក្មេងប្រុសដោយសារការផឹកទឹកមិនស្អាតហើយបានក្រើនរំលឹកដល់កុមារទាំងអស់កុំឲ្យផឹកទឹកកខ្វក់។

យោងតាមប្រព័ន្ធផ្សព្វផ្សាយក្នុងស្រុកបានឲ្យដឹងថា វាកម្រណាស់សម្រាប់សត្វឈ្លើងដែលអាចរស់នៅក្នុងរាងកាយមនុស្សបានយូរបែបនេះ។

អង្គការសុខភាពពិភពលោកបានប៉ាន់ប្រមាណថា ប្រហែល៨០ភាគរយនៃជំងឺរបស់មនុស្សដូចជាជំងឺរលាកថ្លើមប្រភេទ A, ជំងឺគ្រុនស្វិតដៃជើងនិងអាសន្នរោគគឺបណ្តាលមកពីការផឹកទឹកកខ្វក់៕

សូមទស្សនាវីដេអូខាងក្រោម៖

ប្រែសម្រួលដោយ៖ Vann Vann

ប្រភព៖ Daily Star