សេដ្ឋកិច្ច

ម៉ាស៊ីនផលិតអគ្គិសនីដើរដោយធ្យូងថ្មនៅខេត្តព្រះសីហនុ បានបើកដំណើរការសាកល្បង

បានផុស

៤ years មុន

នៅ

ថ្ងៃព្រហស្បតិ៍ ៦ តុលា ២០២២

ដោយ

ម៉ាស៊ីនផលិតអគ្គិសនីដើរដោយធ្យូងថ្ម មានកម្លាំង ៣៥០មេហ្គាវ៉ាត់ របស់ក្រុមហ៊ុន ហ័រទាន ស្ថិតនៅភូមិ២ ឃុំកំពេញ ស្រុកស្ទឹងហាវ ខេត្តព្រះសីហនុបានបើកដំណើរការសាកល្បងហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការដំណើរការសាកល្បងនេះ បានធ្វើឡើងនៅព្រឹកថ្ងៃទី០៦ ខែតុលា ឆ្នាំ២០២២ ក្រោមអធិបតីភាពលោក ស៊ុយ សែម រដ្ឋមន្ត្រីក្រសួង រ៉ែ និងថាមពល លោក មីន កុម្ភៈ អភិបាលរងខេត្តព្រះសីហនុ និងមន្ត្រីជំនាញជាច្រើនទៀត ។

បើតាមមន្ត្រីជំនាញក្រសួងរ៉ែ និងថាមពលកម្ពុជា នឹងទទួលបានថាមពលអគ្គិសនីពីរោងចក្រដុតធ្យូងថ្មជាង២ពាន់មេហ្គាវ៉ាត់នៅឆ្នាំ២០២៤ខាងមុខនេះ សម្រាប់បម្រើដល់ផលប្រយោជន៍សេដ្ឋកិច្ច។

បច្ចុប្បន្នកម្ពុជា មានរោងចក្រដុតធ្យូងថ្មរបស់ក្រុមហ៊ុនពីរក្នុងខេត្តព្រះសីហនុ ដែលមានថាមពលសរុបប្រមាណ ៦៣៥មេហ្គាវ៉ាត់ និងរោងចក្រចំនួនបីទៀត កំពុងមានការសាងសង់និងរៀបសាងសង់ ដែលមានថាមពលសរុបចំនួន ១៦៦៥មេហ្គាវ៉ាត់ ដែលរោងចក្រទាំងនោះ មានទីតាំងនៅនៅក្នុងខេត្តព្រះសីហនុ កោះកុង និងឧត្តរមានជ័យ ហើយគ្រោងនឹងបញ្ចប់ការសាងសង់ទាំងស្រុងនៅក្នុងឆ្នាំ២០២២ ឆ្នាំ២០២៣ និងឆ្នាំ២០២៤ខាងមុខនេះ។

តាមរបាយការណ៍របស់ក្រសួងរ៉ែ និងថាមពលបានឲ្យដឹងថា ប្រភពថាមពលអគ្គិសនីរបស់កម្ពុជារួមមានវារីអគ្គិសនីប្រមាណ ៣៣ភាគរយស្ថានីយដុតធ្យូងថ្មប្រមាណ ៣៣ភាគរយថាមពលនាំចូលប្រមាណ ២៥ភាគរយ ប្រេងខ្មៅ និងម៉ាស៊ូតប្រមាណ ៧ភាគរយ និងថាមពលកកើតឡើងវិញប្រមាណ១,៣ភាគរយ។

យ៉ាងណាក៏ដោយរដ្ឋាភិបាលកម្ពុជានឹងលែងឱ្យមានការសាងសង់រោងចក្រអគ្គិសនីដើរដោយ ធ្យូងថ្មបន្ថែមទៀតហើយ ចាប់ពីឆ្នាំ២០២២នេះតទៅ ដើម្បីរក្សានិរន្តរភាពនៃសន្តិសុខថាមពលអគ្គិសនី និងកំណើនសេដ្ឋកិច្ច។

លោក ហេង គន្ធលាង អ្នកនាំពាក្យក្រសួងរ៉ែ និងថាមពល ធ្លាប់បានមានប្រសាសន៍ថា ជាគោលនយោបាយរបស់រាជរដ្ឋាភិបានកម្ពុជា គឺបញ្ឈប់ការសាងសង់ស្ថានីយធ្យូងថ្មបន្ថែមទៀតហើយ ចាប់ពីឆ្នាំ២០២២នេះតទៅ ដោយផ្តោតទៅលើការប្រើប្រាស់ការឥន្ធនៈផូស៊ីលដែលជួយរក្សានិរន្តរភាពនៃសន្តិសុខថាមពលអគ្គិសនី និងកំណើនសេដ្ឋកិច្ច។ ប៉ុន្តែចំពោះស្ថានស្ថានីយធ្យូងថ្មចំនួន៣ទីតាំង ដែលកំពុងដំណើរការសាងសង់ គឺនៅតែបន្តដំណើរការដដែល៕ សំអឿន