ឃាត់ខ្លួនជនសង្ស័យ២នាក់ក្រោយធ្វេីសកម្មភាព​ឆក់ការបូបពីស្ត្រីម្នាក់គេចខ្លួនបាន២ម៉ោង

ជនសង្ស័យ២នាក់ធ្វេីសកម្មភាពឆក់ការបូបស្ពាយពីស្ត្រីម្នាក់បានសម្រេចកាលពីវេលាម៉ោង០៧និង១០នាទី ថ្ងៃទី១៨ ខែវិច្ឆិកា ឆ្នាំ២០២២ នៅចំណុចស្ពានអាកាសចោមចៅ ភូមិថ្នល់បំបែក សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ហេីយព្យាយាមគេចខ្លួនបាន២ម៉ោងត្រូវបានសមត្ថកិច្ចតាមស្រាវជ្រាវចាប់បានមកវិញចាត់តាមច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនរងគ្រោះឈ្មោះ ជ្រុន ស្រីង៉ា ភេទស្រីអាយុ២៨ឆ្នាំ មុខរបរពេទ្យ មានស្រុកកំណេីតនៅភូមិដេីមដូង ឃុំដេីមដូង ស្រុកអង្គជ័យ ខេត្តកំពត។ ជនសង្ស័យទី១ ឈ្មោះ ប្រាក់ សុខសេវី ភេទប្រុសអាយុ១៦ឆ្នាំ។ ទី២ឈ្មោះ ហា សុខហេង ភេទប្រុសអាយុ១៧ឆ្នាំ។ សម្ភារៈបាត់បង់មាន ខ្សែដៃមាសចំនួន០១ខ្សែ ចញ្ជៀនមាស០១វង្ស ក្រវិលផ្លាកទីន១គូរ និងប្រាក់៦០ម៉ឺនរៀល ។

តាមសម្តីជនរងគ្រោះបានឲ្យដឹងថា មុនពេលកេីតហេតុគាត់បានជិះម៉ូតូចេញពីផ្ទះនៅភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ បំណងទៅមន្ទីរពេទ្យកាលម៉ែត ធ្វេីដំណេីរតាមបណ្តោយមហាវិថីចោមចៅ ខណៈមកដល់ចំណុចកេីតហេតុស្រាប់តែមានជនង្ស័យម្នាក់ជិះម៉ូតូម៉ាក SUZUKI NEX មកពីក្រោយហេីយធ្វេីសកម្មភាពឆក់កាបូបស្ពាយបានស្រេចរួចគេចខ្លួនបាត់។ ភ្លាមនោះមានម៉ូតូមួយគ្រឿងទៀត(បក្ខពួក) មកពីក្រោយប្រាប់ថា អូនឯងមិនបាច់ដេញទេចាំបងជួយដេញឲ្យហេីយក៏គេចខ្លួនបាត់អស់ទៅ។

ក្រោយកើតហេតុក៏មានប្រជាពលរដ្ឋធ្វើដំណើរតាមដងផ្លូវ ថតបានស្លាកលេខម៉ូតូម៉ាក សង់សេ ១២៥ ចំនួន០២ គ្រឿង ដែលមានស្លាកលេខ ភ្នំពេញ 1JT-8029 និង ភ្នំពេញ 1II-4208 រួចរាយការណ៍មកសមត្ថកិច្ច។ នៅម៉ោងប្រហែល ០៩និង១០នាទី (ក្រោយកើតហេតុរយៈពេលប្រហែល០២ម៉ោង) ក្រុមការងាររបស់ការិយាល័យព្រហ្មទណ្ឌកម្រិតស្រាល និងកម្លាំងព្រហ្មទណ្ឌខណ្ឌពោធិ៍សែនជ័យ ដែលទទួលបទបញ្ជាពីថ្នាក់លើឲ្យស្រាវជ្រាវ និងល្បាតក៏ប្រទះឃើញម៉ូតូដែលមានភិនភាគខាងលើទេីបដេញឃាត់ខ្លួនបានចំនួន០២នាក់ ។

ក្រោយសាកសួរជនសង្ស័យទាំង០២នាក់នោះបានសារភាពថា ពួកគេ និងបក្ខពួកប្រហែល១០នាក់ទៀតពិតជាបានធ្វើសកម្មភាពឆក់កាបូបពីស្ត្រីម្នាក់នោះមែន រួចយកគ្រឿងអលង្ការទាំងនោះទៅលក់នៅផ្សារពោធិចិនតុង បានប្រាក់ចំនួន ១៣០០ ដុល្លារ ចែកគ្នាបានម្នាក់ចំនួន១០០ដុល្លារ បច្ចុប្បន្នការិយាល័យកំពុងបន្តស្វែងរកបក្ខពួកបន្ថែម និងបន្តនីតិវិធីដើម្បីបញ្ជូនជនសង្ស័យទៅសាលាដំបូងរាជធានីភ្នំពេញ៕

អត្ថបទ៖ សុខា