​រដូវវប្បធម៌លើកទី៤ ធ្វើឡើង​ក្រោមប្រធានបទ «តែឯង តែយើង»​ រំពឹងទទួលបានការគាំទ្រពីយុវជន

កម្មវិធីរដូវវប្បធម៌ឆ្នាំ ២០២៣ លើកទី៤ ​រៀបដោយអង្គការសិល្បៈខ្មែរអមតៈ ក្រោមប្រធានបទ «តែឯង តែយើង»​ ដែលមានដាក់បញ្ចូលព្រឹត្តិការណ៍ជាច្រើនដូចជា អំណានអក្សរសិល្ប៍ច្នៃប្រឌិត ល្ខោនអាន ស្នាដៃឌីជីថល និងការសម្ដែងទស្សនីយភាព​ផ្សេងៗ។

​កម្មវិធីរដូវវប្បធម៌បានដំណើរការជារៀងរាល់ឆ្នាំ ចាប់តាំងពីឆ្នាំ ២០១៨ ដើម្បីជំរុញការបញ្ចេញមតិ ការ​ច្នៃប្រតិដ្ឋ ដល់ក្រុមយុវជន តាមរយៈការសម្ដែង សិក្ខាសាលា តាំងពិពណ៌ និងកិច្ចពិភាក្សា។​

​លោក សយ ច័ន្ទបូរី អ្នកដឹកនាំកម្មវិធីរដូវវប្បធម៌ រដូវកាលទី៤ ដែល​រៀបចំនៅ​រាជ​ធានីភ្នំពេញ បាន​ឱ្យ​ដឹងថា ក្នុងកម្មវិធីនេះ​មានព្រឹត្តិការណ៍ជាច្រើនរួមាន អំណានអក្សរសិល្ប៍ច្នៃប្រតិដ្ឋចំនួន ៤ ស្នាដៃ, ល្ខោនអាន ៣ ស្នាដៃ ព្រមទាំងការសម្ដែទស្សនីយភាពនៅលើឆាកចំនួន ៥ ដែលមានសម្ដែងបុរាណ និង​តន្តី្រ។

​នៅក្នុងឆ្នាំ ២០២៣នេះ កម្មវិធីរដូវវប្បធម៌លើកទី៤ នឹងចាប់ផ្ដើមការសម្ដែង​នៅរាជធានីភ្នំពេញ អំឡុង​ខែកុម្ភៈ ដល់ខែមីនា ​នៅទីកន្លែងចំនួន ៤ ផ្សេងគ្នារួមមានវិទ្យាស្ថានបារាំងកម្ពុជា សាកល​វិទ្យាល័យ​ជាតិគ្រប់គ្រង Friends Future Factory និង Acting Academy។ ហើយក្នុងកំឡុងខែមីនា កម្មវិធី​រដូវវប្បធម៌ និងនាំយកសិក្ខាសាលា និងស្នាដៃ​ទៅសម្ដែងនៅតាមបណ្ដាខេត្តចំនួន​ ៤ ផង​ដែរ។

អ្នកស្រី ថន សីម៉ា ​អ្នកដឹកនាំកម្មវិធីដំណើរ​​ទស្សនាចរ​នៃ​រដូវ​វប្បធម៌ទៅតាមបណ្ដាខេត្តបានឱ្យដឹងថា គោលបំណងនៃការដឹកនាំការសម្ដែងទៅតាមបណ្ដារខេត្តគឺយើងចង់បង្កលទ្ធភាពឱ្យប្រជាជន​នៅក្នុងសហគមមានឱកាសទស្សនានូវ​ស្នាដៃសិល្បៈថ្មីៗ ក៏ដូចជាទទួលបាននូវចំណេះដឹង​ ខណៈ​ការសម្ដែងនីមួយៗ​សុទ្ធតែបង្កប់នូវអត្ថន័យ​ទាក់ទងនឹងបរិបទសង្គមបច្ចុប្បន្ន។

​ការរៀបចំ​នៅឆ្នាំ ២០២២ ​ទទួលបានអ្នកចូលរួម​ប្រមាណ ៨ ពាន់នាក់ ដោយបានធ្វើដំណើរទៅ​ខេត្ត​បាត់ដំបង បន្ទាយមានជ័យ កំពង់ធំ និងខេត្តសៀមរាប។ សម្រាប់ឆ្នាំ ២០២៣ កម្មវិធី​គ្រោងរៀបចំ​ចំនួន ៤ ខេត្តគឺ ខេត្តកំពង់ធំ ព្រះវិហារ កំពង់ឆ្នាំ និងខេត្តប៉ៃលិន។

​លោកស្រី ណម ណារីម អនុប្រធាននាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈ បានឱ្យដឹងថាកម្មវិធីរដូវវប្បធម៌នេះមានសារសំខាន់សម្រាប់សិល្បៈករ ដែលពួកគាត់​អាចបញ្ចេញ​នូវគំនិត និងស្នាដៃ ទាក់ទងនឹងការសម្ដែង ឬទស្សនីយភាពក៏ដោយ ប្រសិនបើយើង​មិនបានសម្ដែង វានឹង​រលូត ឬអាចនឹងបាត់បង់ប្រសិនបើយើង​មិនរំលឹក៕

អត្ថបទ៖ ឡេង ដេត