សម្ដេចម៉ែ ប្រទាន ៤៨ ម៉ឺនដុល្លារ ជួយវិស័យសុខាភិបាល និងព្រះពុទ្ធសាសនា

យោងតាមព្រះរាជតម្រិះដ៏ខ្ពង់ខ្ពស់របស់សម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត សម្តេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង ព្រះរាជតំណាងដ៏ខ្ពង់ខ្ពស់របស់សម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត រួមសកម្មភាពដោយ ឯកឧត្តម គុយ សុផល ឧត្តមប្រឹក្សាផ្ទាល់ព្រះមហាក្សត្រ និងជាទេសរដ្ឋមន្ត្រីទទួលបន្ទុកកិច្ចការទូទៅអមក្រសួងព្រះបរមរាជវាំង បានរៀបចំពិធីប្រគល់ព្រះរាជទ្រព្យ ចំនួន ៤៨ ម៉ឺនដុល្លារសហរដ្ឋអាមេរិក ដែលជាព្រះរាជទានដ៏ថ្លៃថ្លារបស់សម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត ជូនដល់មន្ទីរពេទ្យចំនួន៥ និងរួមចំណែកក្នុងវិស័យព្រះពុទ្ធសាសនា។

សម្ដេចព្រះមហាក្សត្រីព្រះវររាជមាតាជាតិខ្មែរ នរោត្តម មុនីនាថសីហនុ ប្រោសព្រះរាជទានព្រះរាជទ្រព្យ ជូនមន្ទីរពេទ្យមួយចំនួនក្នុងរាជធានីភ្នំពេញ និងវិស័យព្រះពុទ្ធសាសនាចំនួន ៧ មានដូចជា៖

១, មន្ទីរពេទ្យហ្លួងម៉ែ ចំនួន ២០ ម៉ឺនដុល្លារសហរដ្ឋអាមេរិក, ម៉ាស ១០ ០០០ សន្លឹក, ថ្នាំចិន ១ ០០០ ប្រអប់

២, មន្ទីរពេទ្យគន្ធបុប្ផា ចំនួន ១០ មុឺនដុល្លារសហរដ្ឋអាមេរិក, ម៉ាស ១០ ០០០ ប្រអប់, ថ្នាំ ១ ០០០ ប្រអប់

៣, មន្ទីពេទ្យខ្មែរសូវៀត ចំនួន ១០ ម៉ឺនដុល្លារសហរដ្ឋអាមេរិក, ម៉ាស់ចំនួន ១ ០០០ ប្រអប់, ថ្នាំចិនចំនួន ១ ០០០ ប្រអប់

៤, មន្ទីរពេទ្យបង្អែកសម្ដេចឪ ចំនួន ៣ ម៉ឺនដុល្លារសហរដ្ឋអាមេរិក, ម៉ាសចំនួន ៥ ០០០ ប្រអប់, ថ្នាំចិនចំនួន ៥០០ ប្រអប់

៥, មន្ទីរពេទ្យព្រះសីហនុមណ្ឌលនៃក្តីសង្ឃឹមភ្នំពេញ ចំនួន ៣ ម៉ឺនដុល្លារសហរដ្ឋអាមេរិក, ម៉ាសចំនួន ៥០០ ប្រអប់,
ថ្នាំចិនចំនួន ៥០០ ប្រអប់

៦, មជ្ឍមណ្ឌលព្រះពុទ្ធសាសនាកម្ពុជា ចំនួន ១ ម៉ឺនដុល្លារ

៧, សាងសង់ព្រះពុទ្ធបដិមាលើភ្នំបូកគោ ចំនួន ១ ម៉ឺនដុល្លារ៕