ព្រះមហាក្សត្រ៖អ្នកម្តាយមានគុណធ្ងន់មហិមា ចូរបុត្រគ្រប់គ្នាតបស្នងនូវឧបការគុណអ្នកម្តាយដូចទេវតាខាងដើម

ព្រះករុណា ព្រះបាទ សម្ដេចព្រះបរមនាថ នរោត្ដម សីហមុនី តាមរយៈព្រះរាជសារ ទ្រង់ឱ្យកូនៗគ្រប់រូប តបស្នងសងគុណ ទំនប់បម្រុងអ្នកម្ដាយឱ្យដូចទេវតាខាងដើម ពីព្រោះអ្នកម្ដាយគឺមានគុណធ្ងន់អនេកអនន្តមិនអាចគណនាបាន។ ព្រះករុណា មានព្រះរាជចំណារបែបនេះ នៅក្នុងព្រះរាជសារ ដែលឡាយព្រះហស្តលេខាកាលពីថ្ងៃទី៦ ខែឧសភា អបអរសាទរទិវាគុណអ្នកម្តាយ ថ្ងៃទី១២ ខែឧសភា។

ព្រះករុណជាអម្ចាស់ជីវិតលើត្បូង មានព្រះរាជចំណារបែបនេះ៖«អ្នកម្តាយមានគុណធ្ងន់មហិមា ដែលពុំអាចពិពណ៌នារៀបរាប់បាន ចូរបុត្រគ្រប់គ្នាតបស្នងនូវឧបការគុណ អ្នកម្តាយគ្រប់ប្រាណ ជាបុព្វទេវា ។ អ្នកម្តាយមានតួនាទីស្នូលដ៏សំខាន់ អប់រំបុត្រឱ្យក្លាយជាកម្លាំងចលករក្នុងការអភិរក្ស ថែរក្សា ការពារ លើកស្ទួយ និងអភិវឌ្ឍមរតកវប្បធម៌ ទំនៀមទម្លាប់ ប្រពៃណី ដែលជាអត្តសញ្ញាណ ជាដួងព្រលឹងជាតិ និងជាវប្បធម៌កតញ្ញូ ឱ្យបានស្ថិតស្ថេរគង់វង្សតាំងពីដើមមក និងបន្តជារៀងរហូត»។

ព្រះមហាក្សត្រ​ ទ្រង់ក៏មានព្រះរាជចំណារថា ទិវាគុណអ្នកម្តាយ ត្រូវបានប្រារព្ធឡើង ដើម្បីរំលឹកនូវគុណូបការៈដ៏មហាធ្ងន់វិសេសវិសាលមិនមានអ្វីអាចប្រៀបផ្ទឹមបាន នៃមាតាគ្រប់រូប ដែលខិតខំចំណាយកម្លាំងកាយ កម្លាំងចិត្តចិញ្ចឹមបីបាច់ ថែរក្សា អប់រំបុត្រដោយឥតត្អូញត្អែរ មិនគិតដល់ការហត់នឿយ និងមានសន្តានចិត្តប្រកបដោយ ព្រហ្មវិហារធម៌ គឺ មេត្តា ករុណា មុទិតា ឧបេក្ខា ចំពោះបុត្រគ្រប់រូប៕