ព័ត៌មានអន្ដរជាតិ

ប្រទេសអឺរ៉ុបចំនួន ១១ សន្យាផ្ដល់ជំនួយមិនធ្លាប់មានដល់ អ៊ុយក្រែន

បានផុស

៣ years មុន

នៅ

ថ្ងៃសុក្រ ២០ មករា ២០២៣

ដោយ

រដ្ឋមន្ត្រីការពារជាតិ និងអ្នកតំណាងផ្សេងទៀតមកពីប្រទេសអឺរ៉ុបចំនួន ១១ បានសន្យានឹងផ្តល់ “កញ្ចប់ជំនួយមិនធ្លាប់មាន” ឲ្យយោធាអ៊ុយក្រែន ស្របពេលដែលប្រតិបត្តិការសឹករបស់រុស្ស៊ីអូសបន្លាយពេលជិត ១ ឆ្នាំ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកតំណាង រួមទាំងមកពីចក្រភពអង់គ្លេស ប៉ូឡូញ និងប្រទេសបាល់ទិកទាំងបី ដែលបានជួបពិភាក្សាគ្នានៅរដ្ឋធានី Tallinn នៃប្រទេសអេស្តូនី បានចេញសេចក្តីថ្លែងការណ៍រួមបែបនេះ នៅមុនកិច្ចប្រជុំស្តីពីជំនួយយោធាសម្រាប់អ៊ុយក្រែនដែលប្រព្រឹត្តទៅក្នុងប្រទេសអាល្លឺម៉ង់នៅថ្ងៃសុក្រនេះ ។

សេចក្តីថ្លែងការណ៍ដែលមានឈ្មោះថា “Tallinn Pledge” បានឲ្យដឹងថា ប្រទេសទាំង ១១ ជំរុញសម្ព័ន្ធមិត្ត និងដៃគូផ្សេងទៀត “ធ្វើតាម និងរួមចំណែកផ្ដល់កញ្ចប់ជំនួយយោធាតាមការគ្រោងទុកឲ្យបានឆាប់តាមដែលអាចធ្វើទៅបានដើម្បីបញ្ជូនទៅកាន់រដ្ឋាភិបាលទីក្រុងកៀវ” ។

ទន្ទឹមនោះ អេស្តូនី ដែលមានព្រំដែនជាប់នឹងរុស្ស៊ី បានសន្យាផ្តល់កញ្ចប់ជំនួយដែលមានតម្លៃប្រហែល ១១៣ លានអឺរ៉ូ ឬប្រហែល ១២២ លានដុល្លារ រួមទាំងកាំភ្លើងធំ និងគ្រាប់កាំភ្លើងផងដែរ ។

រដ្ឋាភិបាលអេស្តូនីនិយាយថា កញ្ចប់ថវិកាថ្មីនេះនឹងនាំមកនូវជំនួយយោធាសរុបរបស់ប្រទេស ដែលផ្ដល់ឲ្យអ៊ុយក្រែនឡើងដល់ទៅ ៣៧០ លានអឺរ៉ូ ឬច្រើនជាង ១ ភាគរយនៃផលិតផលក្នុងស្រុកសរុបរបស់ប្រទេសអេស្តូនី ។

ដោយឡែកក្រៅពីប្រទេសទាំង ១១ ប្រទេសស៊ុយអែតក៏បានប្រកាសកញ្ចប់ជំនួយយោធាថ្មីដល់អ៊ុយក្រែនផងដែរ ក្នុងទំហំទឹកប្រាក់ប្រហែល ៤១៦ លានដុល្លារ ខណៈកញ្ចប់នេះរួមមានរថពាសដែកប្រយុទ្ធ CV90, ប្រព័ន្ធកាំភ្លើងធំ Archer និងអាវុធប្រឆាំងរថក្រោះជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ណាតូ ថា រុស្ស៊ី នឹងបើកការវាយលុកថ្មីលើ អ៊ុយក្រែន រយៈពេល ៣ ខែទៀត