សកម្មជនអតីតបក្សសង្គ្រោះជាតិ នៅកម្ពុជាក្រោម ១៦នាក់ បានចូលជាសមាជិកគណបក្សប្រជាជនកម្ពុជា

សកម្មជនអតីតគណបក្សសង្គ្រោះជាតិចំនួន ១៦នាក់ ដែលជាខ្មែរកម្ពុជាក្រោម បានសម្រេចចិត្តចូលរួមជីវភាពនយោ បាយជាមួយគណបក្សប្រជាជនកម្ពុជា។ សកម្មជនទាំងនោះ បញ្ជាក់ថា ការសម្រេចចិត្តចូលជាសមាជិកគណបក្សប្រជាជនកម្ពុជា គឺដោយសារគណបក្សប្រជាជនកម្ពុជា ជាគណបក្សតែមួយគត់ដែលជាទីពឹងរបស់ប្រជាជន ក្នុងការដឹកនាំកម្ពុជាឲ្យមានការរីកចម្រើន។

បើតាមលោក សឿង សុធានី ប្រធានសមាគមសប្បុរសធម៌ខ្មែរកម្ពុជាក្រោម គឺនៅមានប្រជាពលរដ្ឋខ្មែរដែលកំពុងរស់នៅកម្ពុជាក្រោមប្រមាណជាង ១០០នាក់ថែមទៀត ក៏គ្រោងនឹងដាក់ពាក្យស្នើសុំចូលជាសមាជិកគណបក្សប្រជាជនកម្ពុជា នាពេលខាងមុខនេះដែរ។ លោក សឿង សុធានី បានបញ្ជាក់ថា អ្នកទាំងនោះ គឺសុទ្ធសឹងជាខ្មែរកម្ពុជាក្រោមដែលជាអតីតសកម្មជន និងជាអ្នកគាំទ្រដ៏សកម្មរបស់អតីតគណបក្សសង្គ្រោះជាតិ នាពេលកន្លងមក។

លោកប្ សឿង សុធានី លើកឡើងថា ការចូលជាសមាជិកគណបក្សប្រជាជនកម្ពុជា គឺដោយសារមានការជឿជាក់លើគណបក្សប្រជាជនកម្ពុជា ជាពិសេសមើលឃើញការដឹកនាំរបស់សម្ដេចតេជោ ហ៊ុន សែន ប្រកបដោយមគ្គុទេសក៍ និងបាននាំនាវាកម្ពុជាដល់ត្រើយសុខសន្តិភាព ស្ថេរភាពនយោបាយ និងមានការរីកចម្រើនលើគ្រប់វិស័យទាំងអស់។

តំណាងសកម្មជនទាំង ១៦រូប ក៏បានប្រកាសអំពាវនាវដល់អ្នកគាំទ្រ ក៏ដូចជាប្រជាពលរដ្ឋខ្មែរមួយចំនួនដែលធ្លាប់គាំទ្រអតីតបក្សសង្គ្រោះជាតិ ងាកមកចូលរួមជាមួយគណបក្សប្រជាជនកម្ពុជាវិញ ដើម្បីចូលរួមជាកម្លាំងខ្មែរតែមួយ សំដៅធានាការអភិវឌ្ឍប្រទេសកម្ពុជាកាន់តែរីកចម្រើនថែមទៀត ក្រោមការដឹកនាំរបស់គណបក្សប្រជាជនកម្ពុជា ជាពិសេសការដឹកនាំដ៏ត្រឹមត្រូវរបស់សម្ដេចតេជោ ហ៊ុន សែន ជានាយករដ្ឋមន្ត្រី៕

ដោយ៖ ធឿន វ៉ាន់សុង