នាយករដ្ឋមន្ត្រី ណែនាំឲ្យដាក់តម្លៃលើផលិតផល និងចំណីអាហារ ដែលប្រជាពលរដ្ឋលក់តូចតាច

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានណែនាំដល់ក្រសួងពាក់ព័ន្ធ ត្រូវរៀបចំឲ្យមានការដាក់តម្លៃទៅលើផលិតផលនានា ជាពិសេសទៅលើផលិតផល និងចំណីអាហារ ដែលប្រជាពលរដ្ឋលក់តូចតាច។

នៅក្នុងពិធីចែកសញ្ញាបត្រ ជូននិស្សិត​សាកលវិទ្យាល័យបៀលប្រាយជាង ៤ពាន់នាក់ នាព្រឹកថ្ងៃទី ១៦ ខែមីនានេះ សម្ដេចតេជោ ហ៊ុន សែន ​បានណែនាំដល់ក្រសួងទេសចរណ៍ និងក្រសួងពាណិជ្ជកម្ម សហការគ្នាដើម្បីដាក់តម្លៃនៅលើផលិតផលនានា ជាពិសេសអ្នកលក់តូចតាច ដើម្បីកុំឲ្យភ្ញៀវទេសចរជាតិ-អន្តរជាតិ ពិបាកសួរតម្លៃបន្តទៀត ជាពិសេសនៅក្នុឱកាសពិធីបុណ្យចូលឆ្នាំថ្មី នាពេលខាងមុខនេះ។

សម្ដេចតេជោ ហ៊ុន សែន ថ្លែងបែបនេះថា «សូមឲ្យក្រសួងទេសចរណ៍ និងក្រសួងពាណិជ្ជកម្ម ចូលរួមជាមួយគ្នា ដើម្បីដាក់ជាតម្លៃកុំឲ្យពិបាកសួរៗ ដូចជាជនបរទេស ឧទាហរណ៍ថា គាត់ចង់ស៊ីនំ នំហ្នឹងវាតម្លៃប៉ុន្មាន គឺគាត់អត់ដឹង បើអញ្ចឹងទេយើងសរសេរទៅ»។

សម្ដេចនាយករដ្ឋមន្ត្រី បានថ្លែងបន្តថា ការសរសេរតម្លៃនៅលើផលិតផល និងចំណីអាហារបែបនេះ គឺមានភាពងាយស្រួលទាំងភ្ញៀវទេសចរជាតិ-អន្តរជាតិ។ តាមការកត់សម្គាល់របស់សម្ដេចតេជោ ហ៊ុន សែន គឺផលិតផលភាគច្រើនហើយដែលបានដាក់តម្លៃ តែនៅសល់អ្នកដែលលក់ផលិតផល និងចំណីអាហារតូចតាច ដែលមិនទាន់បានដាក់៕