រដ្ឋបាលខេត្តកែប រៀបចំតុបតែងកែលម្អតាមបណ្ដោយឆ្នេរ និងសុខសុវត្តិភាពដើម្បីត្រៀមក្នុងព្រឹត្តិការណ៍ស៊ីហ្គេមឆ្នាំ២០២៣

កាលពីថ្ងៃទី១ ខែឧសភា ឆ្នាំ២០២៣ ឯកឧត្តម សោម ពិសិដ្ឋ អភិបាលខេត្តកែប បានលើកឡើងថា ក្នុងព្រឹត្តិការណ៍ស៊ីហ្គេមនេះ ដើម្បីតាមការផ្ដល់ទំនុបចិត្តពីប្រមុខថ្នាក់ដឹកនាំដែលបានប្រគល់ឱ្យរដ្ឋបាលខេត្តកែបធ្វើជាម្ចាស់ផ្ទះក្នុងការប្រកួតកីឡាស៊ីហ្គេមឆ្នាំ២០២៣នៅលើប្រភេទកីឡា ទ្រីយ៉ាត្លុង យើងបានត្រៀមនូវការដែលក្នុងនោះដើម្បីរក្សាសន្តិសុខ និងសណ្តាប់​ធ្នាប់នៅមុនការប្រកួត អំឡុងពេលប្រកួត និងក្រោយការប្រកួត នៅជាមួយគ្នានោះដែរយើងបានដាក់ចេញនូវវិធានការត្រួតពិនិត្យក្នុងការរៀបចំពលរដ្ឋក្នុងមូលដ្ឋានអាជីវកម្មទេសចរណ៍ទាំង៣៨ទីតាំងដើម្បីធានាបានទាំងសណ្តាប់​ធ្នាប់ និងសុវត្ថិភាព និងសោភ័ណភាពអនាម័យ និងបរិស្ថានបានល្អ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋបាលខេត្តកែបក្នុងរយៈពេល១០០ថ្ងៃប៉ុណ្ណោះ ដែលខេត្តកែបបានត្រៀមរៀបចំខ្លួនធ្វើជាម្ចាស់ផ្ទះ ក្នុងព្រឹត្តិការណ៍ស៊ីហ្គេម២០២៣ ដោយមានការរៀបចំកែលំអហេដ្ឋារចនាសម្ព័ន្ធនានានៅក្នុងភូមិសាស្ត្រខេត្តកែប ជាពិសេសទីតាំងដែលនឹងត្រូវធ្វើការប្រកួតកីឡាទ្រីយ៉ាងត្លុង គិតមកទល់ពេលនេះ បានសម្រេចនូវលទ្ធផលល្អប្រសើរ ដែលមិនមានអ្វីជាបញ្ហាចោទ ឬ ការរាំងស្ទះដល់ដំណើរការនៃព្រឹត្តិការណ៍ដ៏សំខាន់នេះទេបានដោយរលូនផងដែរ។

លោក អឹម បញ្ញារិទិ្ធ អភិបាលរងខេត្តកែប ទទួលបន្ទុកលើកិច្ចការងារនេះបានបញ្ជាក់ដែរថា រដ្ឋបាលខេត្តកែប បានត្រៀមកងកម្លាំងជាង៣០០នាក់ ក្នុងការរក្សាសន្តិសុខសណ្តាប់ធ្នាប់ ក្នុងនោះត្រៀមអូប័រសង្រ្គោះ និងរៀបចំទីលានលើទឹកចំនួន០៣គ្រឿង រថយន្តសង្រ្គោះ ចំនួន០៤គ្រឿងផងដែរ។

គួរបញ្ជាក់ថា ប្រតិភូកីឡាចូលរួមនៅខេត្តកែបទាំងអស់មាន៧ប្រទេស សរុប១៦៣រូប ក្នុងនោះមានប្រតិភូ គ្រូបង្វឹក និងអត្តពលិកសរុប១៣៣រូប និងប្រតិភូ ITOs (ចៅក្រម អាជ្ញាកណ្តាល និងមន្រ្តីបច្ចេកទេស) ជាតិ និងអន្តរជាតិ៣០​នាក់៕

អត្ថបទ៖ សឹង រ៉ាត់