ព័ត៌មានជាតិ

ខេត្តកែបមានកន្លែងទេសចរណ៍ពិសេសមួយគឺបន្ទាយប្រណាំងសេះ មានលើកដំបូងនៅកម្ពុជា

បានផុស

៣ years មុន

នៅ

ថ្ងៃសុក្រ ២៦ ឧសភា ២០២៣

ដោយ

លោក សោម ពិសិដ្ឋ អភិបាលនៃគណៈអភិបាលខេត្តកែបបានអះអាងថា បច្ចុប្បន្ននេះរដ្ឋបាលខេត្តកំពុងខិតខំជំរុញការអភិវឌ្ឍន៍ ធ្វើយ៉ាងណាឱ្យបន្ទាយប្រណាំងសេះដែលស្ថិតនៅក្នុងភូមិសាស្រ្តភ្នំវល្លិក្លាយទៅជាគោលដៅទេសចរណ៍ថ្មីមួយបន្ថែមទៀតដល់ភ្ញៀវទេសចរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសន្និសីទ «ភាពជោគជ័យរយៈពេល ៥ ឆ្នាំកន្លងមករបស់រដ្ឋបាលខេត្តកែប» លោក សោម ពិសិដ្ឋ បានគូសបញ្ជាក់ថា អ្វីដែលខេត្តកែបមានលក្ខណៈពិសេសខ្លាំងហើយរាជធានី-ខេត្តដទៃមួយចំនួនមិនអាចមានដូចនោះគឺនៅក្នុងខេត្តកែបមានបន្ទាយប្រណាំងសេះ ការបង្កាត់ពូជគោរ៉ាម៉ាន់ ព្រមទាំងមានសេះប្រណាំងនៅភ្នំវល្លិ។ មិនតែប៉ុណ្ណោះ នៅក្នុងភូមិសាស្រ្តតំបន់ប្រណាំងសេះក៏មានការចិញ្ចឹមគោបង្កាត់ពូជរ៉ាម៉ាន់ ដែលអាចលក់ចេញបានក្នុងមួយក្បាលតម្លៃដល់ ១០ម៉ឺនដុល្លារ។

ត្រង់ចំណុចនេះ លោកអភិបាលខេត្តបានបន្តថា «អ្វីដែលជាយុទ្ធសាស្ត្ររបស់រដ្ឋបាលខេត្ត គឺធ្វើយ៉ាងណារុញច្រានវិស័យទេសចរណ៍ឱ្យទៅដល់តំបន់ដែលធ្លាប់មានសង្គ្រាមដូចជានៅតំបន់ភ្នំវល្លិនេះតែម្តង»។

លោក សោម ពិសិដ្ឋ បានលើកឡើងថា បច្ចុប្បន្នតំបន់ប្រណាំងសេះភ្នំវល្លិមានការតភ្ជាប់បណ្ដាញផ្លូវធំៗ ដែលជាគម្រោងរបស់ក្រសួងសាធារណការ និងដឹកជញ្ជូន អនុវត្តន៍ដោយរដ្ឋបាលខេត្តកំពតតភ្ជាប់មកក្នុងភូមិសាស្ត្រខេត្តកែប។

គួរបញ្ជាក់ផងថា ក្រៅតែពីតំបន់ប្រណាំងសេះតំបន់ភ្នំវល្លិ បានក្លាយជាទីចាប់អារម្មណ៍របស់ភ្ញៀវទេសចរជាតិ និងអន្តរជាតិ ជាហូរហែមកហើយ។ លើសពីនេះទៀត គឺផ្នួររបស់ជនបរទេសទាំង ៣ ដែលមានជនជាតិបារាំង អង់គ្លេស និងអូស្រ្តាលី ដែលស្ថិតនៅក្នុងភូមិចម្ការបី ឃុំភ្នំវល្លិ ស្រុកដំណាក់ចង្អើរ ព្រមទាំងចម្ការម្រេច ចម្ការទុរេន និងចម្ការស្វាយ ក៏បានក្លាយជាតំបន់ទាក់ទាញភ្ញៀវទេសចរ ឱ្យមកទស្សនាទេសភាពដ៏ស្រស់ត្រកាលយ៉ាងច្រើនកុះករផងដែរ៕

Related Topics:លោក សោម ពិសិដ្ឋ