អតីតឯក​អគ្គរដ្ឋទូតជប៉ុន សរសើរ និងអបអរសាទរចំពោះការរៀបចំព្រឹត្តិការណ៍ស៊ីហ្គេមរបស់កម្ពុជា  

អតីតឯក​អគ្គរដ្ឋទូតជប៉ុនប្រចាំកម្ពុជា បានសម្ដែងការកោតសរសើរ និងអបអរសាទរចំពោះការរៀបចំព្រឹត្តិការណ៍ស៊ីហ្គេមលើកទី ៣២ ដែលប្រទេសកម្ពុជាធ្វើជាម្ចាស់ផ្ទះ។

ការកោតសរសើរ និងអបអរសាទរនេះ ធ្វើឡើងនៅពេលសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានទទួល ជួបសម្ដែងការគួរសមជាមួយលោក Gotaro Ogawa ប្រធានក្រុមយូដូកម្ពុជា និងជាអតីតឯក​អគ្គរដ្ឋទូតជប៉ុនប្រចាំកម្ពុជា កាលពីព្រឹកថ្ងៃទី ១៧ ខែឧសភា ឆ្នាំ ២០២៣។

ក្នុងជំនួបនេះ លោក Gotaro Ogawa បានសម្ដែងការកោតសរសើរ និងអបអរសាទរជាមួយសម្ដេចតេជោ ហ៊ុន សែន ក្នុងការរៀបចំព្រឹត្តិការណ៍ស៊ីហ្គេមលើកទី ៣២ ប្រកបដោយជោគជ័យយ៉ាងត្រចេះត្រចង់។ លោក ក៏បានរាយការណ៍ជូនសម្ដេចតេជោថា កីឡាករ-កីឡាការនីកម្ពុជា មានការតស៊ូព្យាយាមជាខ្លាំង នៅពេលដែលពួកគេទៅហ្វឹកហាត់នៅប្រទេសជប៉ុន។

អតីតឯក​អគ្គរដ្ឋទូតជប៉ុនប្រចាំកម្ពុជា បានជម្រាបជូនសម្ដេចតេជោបន្តថា កីឡាករ-កីឡាការនីកម្ពុជា មានសក្ដានុពល និងមានទេពកោសល្យលើប្រភេទកីឡាយូដូ ជាខ្លាំង។ ក្នុងន័យនេះ លោក Gotaro Ogawa បានគោរពស្នើសុំការគាំទ្ររបស់សម្ដេចតេជោ ក្នុងការបន្តជួយបង្វឹកកីឡាករ-កីឡាការនីកម្ពុជា បន្តទៀត។

ជាការឆ្លើយតប សម្ដេចតេជោ ហ៊ុន សែន បានថ្លែងអំណរគុណដល់លោក Gotaro Ogawa ក៏ដូចជាគ្រូបង្វឹក និងប្រជាជនជប៉ុន ដែលបានជួយគាំទ្រការហ្វឹកហាត់របស់កីឡាករ-កីឡាការនីកម្ពុជា រហូតទទួលបានមេដាយប្រភេទយូដូ ដែលពីមុនមកមិនដែលទទួលមេដាយបែបនេះឡើយ។

សម្ដេចតេជោ ហ៊ុន សែន ក៏បានស្នើឲ្យលោក Gotaro Ogawa និងគ្រូបង្វឹកយូដូបន្តជួយហ្វឹកហាត់កីឡាករ-កីឡាការនីកម្ពុជាបន្តទៀត ព្រោះថា បេសកកម្មរបស់កម្ពុជា មិនបញ្ចប់ត្រឹមព្រឹត្តិការណ៍ស៊ីហ្គេមនេះទេ ពោលគឺត្រូវទៅចូលរួមការប្រកួតដទៃទៀត។ ម្យ៉ាងទៀត កីឡានាំមកនូវសុខភាពល្អ និងជាស្ពានផ្សាភ្ជាប់នូវទំនាក់ទំនងរវាងប្រជាជន និងប្រជាជន និងជាពិសេសរវាងយុវជន និងយុវជន៕