សេដ្ឋកិច្ច

ដោយសារវិបត្តិទីផ្សារអចលនទ្រព្យ វៀតណាម លក់ដាច់វីឡាតែមួយខ្នងគត់ក្នុងខែឧសភា

បានផុស

៣ years មុន

នៅ

ថ្ងៃព្រហស្បតិ៍ ១៥ មិថុនា ២០២៣

ដោយ

ដោយសារតែទីផ្សារអចលនទ្រព្យមិនអំណោយផល ទើបធ្វើឲ្យវីឡានៅតំបន់ឆ្នេរក្នុងខេត្ត Hoa Binh ភាគខាងជើងនៃប្រទេសវៀតណាមដែលដាក់លក់ក្នុងតម្លៃជាង ៣៤ ទៅ ៤៣ ម៉ឺនដុល្លារក្នុងមួយយូនីត លក់ដាច់បានតែមួយខ្នងគត់នៅក្នុងខែឧសភា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់តាំងពីចុងឆ្នាំ ២០២២ មក ទីផ្សារអចលនទ្រព្យវៀតណាមជួបវិបត្តិជាខ្លាំង ហើយដោយសារតែមិនមានអតិថិជនទិញនេះហើយ ទើបនាំឲ្យក្រុមហ៊ុនអចលនទ្រព្យជាច្រើនរួមជាមួយអាជីវកម្មតូចៗ ប្រកាសក្ស័យធនបិទទ្វារ ។

បើតាមទិន្នន័យពីក្រុមហ៊ុនប្រឹក្សាអចលនទ្រព្យ DKRA Group បានបង្ហាញថា វីឡាឆ្នេរតែមួយគត់ត្រូវបានលក់នៅទូទាំងប្រទេសកាលពីខែមុន ដែលធ្លាក់ចុះ ៩៩.៦ ភាគរយ ប្រសិនបើប្រៀបធៀបទៅនឹងឆ្នាំមុន ហើយទោះបីជាអ្នកអភិវឌ្ឍន៍បានផ្តល់ការបញ្ចុះតម្លៃជាច្រើនក៏ដោយ ក៏នៅតែមិនមានអ្នកទិញដដែរ ។

ដោយឡែកនៅខេត្តភាគខាងត្បូងវៀតណាមដូចជា ខេត្ត Ba Ria និងខេត្ត Vung Tau, វីឡាចំនួន ៥ នៅដែលដាក់លក់ក្នុងតម្លៃរហូតដល់ ៣ លានដុល្លារក្នុងមួយយូនីត មិនមានការលក់ចេញនោះទេ ខណៈនៅក្នុងខេត្ត Da Nang, Quy Nhon, Khanh Hoa និងខេត្ត Binh Thuan ក៏មិនមានការលក់ចេញផ្ទះដូចគ្នា ។

ពាក់ព័ន្ធនឹងបញ្ហានេះដែរ លោក Trang Bui នាយកភ្នាក់ងារអចលនទ្រព្យ Cushman & Wakefield បានលើកឡើងថា វាមិនទំនងទេដែលតម្លៃអចលនទ្រព្យប្រណីតនឹងកើនឡើងក្នុងរយៈពេលខ្លីខាងមុខនេះ ។ ដូច្នេះ អ្នកអភិវឌ្ឍបានសម្រេចចិត្តលក់គម្រោងលំនៅដ្ឋានរបស់ពួកគេទាំងខាតបង់ ដើម្បីបានលុយមកវិញខ្លះ ៕

ប្រែសម្រួល៖ នាង រតនៈ

ប្រភព៖ VN Express

ចុចអាន៖ តម្រូវការគ្រឿងសំណង់ វៀតណាម ធ្លាក់ចុះខ្លាំង ក្រោយទីផ្សារអចលនទ្រព្យ កំពុងជាប់គាំង