សម្ដេចតេជោ ហ៊ុន សែន អះអាងថា កម្លាំងបាក់ទ័ពផ្ទុះអាវុធនៅវៀតណាមរត់ចូលដីកម្ពុជា

សម្ដេចតេជោ ហ៊ុន សែន នាយករដ្ឋមន្ត្រីកម្ពុជាបានអះអាងនៅថ្ងៃទី ២៨ ខែមិថុនានេះថា កម្លាំងបាក់ទ័ពផ្ទុះអាវុធនៅវៀតណាមកាលពីពាក់កណ្ដាលខែមិថុនា បានរត់ចូលមកកម្ពុជា ខណៈដ្រូនមួយចំនួនបានបង្ហោះចូលមកធ្វើសកម្មភាពនៅភូមិភាគឦសាននៃប្រទេសកម្ពុជាប្រមាណ ១ សប្ដាហ៍ហើយ។

សម្ដេចតេជោ ហ៊ុន សែន៖ «ខ្ញុំជឿថា កម្លាំងបាក់ទ័ពដែលរត់ពីវៀតណាមនៅក្នុងដីខ្មែរ អាពួកនេះ មកធ្វើទំនាក់ទំនងជាមួយអាពួកបាក់ទ័ពហ្នឹងឯង ព្រោះវាគ្មានហេតុផលបញ្ជូនដ្រូនហ្នឹងមកទេ»។

សម្ដេចនាយករដ្ឋមន្ត្រីបានលើកករណីបុរស ២ នាក់ ដែលសមត្ថកិច្ចបានដេញតាមរហូតធ្លាក់ទូរស័ព្ទ ហើយមានការខលចូលមកស្ដាប់ដឹងថា ទូរស័ព្ទមកពីប្រទេសវៀតណាមសំឡេងជនជាតិភាគតិច។

សម្ដេចតេជោ ហ៊ុន សែន អះអាងថា ក្រុមនេះគឺជនជាតិម៉ុងតាញ៉ា ឬដេហ្កា ដែលបានចុះហត្ថលេខារវាងលោក កុក សជាមួយទណ្ឌិត សម រង្ស៊ី កាត់ដីខ្មែរ ៤ ខេត្តទៅឱ្យវៀតណាម។

សម្ដេចតេជោ ដាក់ការសង្ស័យថា ក្រុមនេះកំពុងហ្វឹកហាត់នៅប្រទេសមួយក្នុងតំបន់ដែលសម្ដេចមិនបញ្ចេញឈ្មោះ និងអាចមកតាមសមុទ្រ ហើយឆ្លងតាមកម្ពុជាមុនពេលផ្ទុះអាវុធនៅវៀតណាមកាលពីពាក់កណ្ដាលខែ។ ទោះជាយ៉ាងណា សម្ដេចតេជោបានបញ្ជាឱ្យបំពាក់កាំភ្លើងគ្រប់ធុនបាញ់ទម្លាក់ដ្រូនដែលហោះចូលមកកម្ពុជា និងតាមស្រាវជ្រាវរុករកក្រុមជនសង្ស័យដែលកំពុងតាំងមូលដ្ឋាននៅទឹកដីកម្ពុជា៕