សំពោចក្រអូបមួយគូដឹកមកពីសួនភ្នំតាម៉ៅយកមកផ្សាំងមុនដោះលែងចូលឧទ្យានអង្គរ

សត្វសំពោចក្រអូបចំនួន ២ក្បាលនេះ មានញី១ និងឈ្មោល១ ត្រូវបានអាជ្ញាធរជាតិអប្សរាសហការជាមួយរដ្ឋបាលព្រៃឈើភ្នំពេញ និងអង្គការសម្ព័ន្ធមិត្តសត្វព្រៃ (Wildlife Alliance) បានដឹកជញ្ជូនពីមជ្ឈមណ្ឌលសង្រ្គោះសត្វព្រៃភ្នំតាម៉ៅ កាលពីថ្ងៃទី ៧ ខែកក្កដា ឆ្នាំ២០២៣ ហើយយកមកផ្សាំងក្នុងទ្រុង ដែលក្រុមការងារមានគម្រោងនឹងដោះលែងចូលទៅក្នុងព្រៃធម្មជាតិនៃឧទ្យានអង្គនៅពេលខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Nick Mark អ្នកជំនាញអភិរក្សសត្វព្រៃអន្តរជាតិរបស់អង្គរការ Wild life Alliance មានប្រសាសន៍កាលពីពេលថ្មីៗនេះថា ជាច្រើនឆ្នាំមកនេះ អង្គការអភិរក្សសត្វព្រៃអន្តរជាតិ ដែលសហការជាមួយរដ្ឋបាលព្រៃឈើនិងអាជ្ញាធរជាតិអប្សរា បានដោះលែងសត្វព្រៃជាច្រើនប្រភេទនៅក្នុងតំបន់រមណីយដ្ឋានអង្គរ ដូចជាសត្វទោច ស្វាព្រាហ្មណ៍ ឈ្លូស សំពោច ឆ្មាដាវ សត្វកេងកង ក្ងោក សត្វភេ និងឆ្កែព្រៃ ដែលបច្ចុប្បន្នបានកើនឡើងចំនួន៧៥ក្បាល។

លោកបន្តថា សត្វព្រៃនៅក្នុងតំបន់អង្គរ ពិតជាមានសារសំខាន់យ៉ាងខ្លាំង ក្នុងការជួយទាក់ទាញភ្ញៀវទេសចរផ្នែកធម្មជាតិ ឱ្យកាន់តែមានចំនួនច្រើនឡើងថែមទៀតជាមួយនិងទេសចរណ៍វប្បធម៌។

កន្លងមកគម្រោងទទួលបានជោគជ័យក្នុងការដោះលែងសត្វព្រៃជាច្រើនប្រភេទចូលក្នុងព្រៃធម្មជាតិនៃឧទ្យានអង្គរ មានដូចជា សត្វទោចមកុដ ចំនួន៨ក្បាល ហើយវាក៏បង្កើតកូនបន្ថែមបានចំនួន៧ក្បាល សត្វឈ្លូសចំនួន៦ក្បាល សត្វស្វា ចំនួន១២ក្បាល សត្វសំពោចក្រអូបចំនួន៥ក្បាល សត្វភេខ្លួនរលោងចំនួន៨ក្បាល (កើតកូនបានចំនួន៥ក្បាល) សត្វឆ្មារដាវចំនួន២ក្បាល កេងកងតូចចំនួន៧ក្បាល កេងកងធំចំនួន៦ក្បាល សត្វព្វាំងចំនួន ៧ ក្បាល សត្វក្ងោកចំនួន៩​ក្បាល សត្វអន្សងចំនួន១ក្បាល និងសត្វផ្សេងៗមួយចំនួនទៀត ដែលមកដល់ឥឡូវសត្វទាំងអស់នេះនៅតែមានវត្តមាននៅទីនោះនៅឡើយ ក្រោមការយកចិត្តទុកដាក់តាមដាន និងថែទាំជាប្រចាំពីក្រុមការងារ៕

អត្ថបទ៖ គឿន វេត