ព័ត៌មានជាតិ

គ្រូវិទ្យាល័យជនបទមួយរូប មានបងប្អូន ៣ នាក់សុទ្ធតែចាប់អាជីពជាគ្រូបង្រៀន

បានផុស

៣ years មុន

នៅ

ថ្ងៃសុក្រ ១៤ កក្កដា ២០២៣

ដោយ

Din Thary

កញ្ញា លីន ស្រីលាប ស្ថិតនៅក្នុងចំណោមបងប្អូន ៣ នាក់ ដែលបានចាប់អាជីពធ្វើជាគ្រូបង្រៀន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈកិច្ចសម្ភាសជាមួយ «កម្ពុជាថ្មី» កញ្ញា លីន ស្រីលាប បានឲ្យដឹងថា កញ្ញាមានស្រុកកំណើតនៅខេត្តកំពត ហើយមានបងប្អូន ៣ នាក់ សុទ្ធតែចាប់យកអាជីពធ្វើជាគ្រូបង្រៀន។ កត្តាមួយនេះហើយ ដែលទាញទឹកចិត្តឱ្យកញ្ញាសម្រេចប្រឡងចូលធ្វើជាគ្រូបង្រៀនដូចគ្នាដែរ។

ជាក់ស្ដែង បច្ចុប្បន្ននេះកញ្ញាបានបង្រៀនផ្នែកជីវៈវិទ្យានៅវិទ្យាល័យជីផាត ស្ថិតនៅស្រុកថ្មបាំង ខេត្តកោះកុងដែលមានចម្ងាយ ១២៦ គីឡូម៉ែត្រ ពីក្រុងខេមរភូមិន្ទ។

ជុំវិញការមកបង្រៀននៅវិទ្យាល័យជីផាត អ្នកគ្រូ អឿន ស្រីលាប ប្រាប់ដូច្នេះថា «ដំបូងឡើយខ្ញុំមិនស្គាល់ពីតំបន់ជីផាតទេ។ ខ្ញុំភ្ញាក់ផ្អើលជាខ្លាំង ដោយសារចូលមកដំបូង ផ្លូវចូលមកមានភាពស្ងាត់ជ្រងំ និងសម្បូរដោយព្រៃ មិនសូវមានផ្ទះអ្នកស្រុករស់នៅ»។

ការមកបង្រៀននៅតំបន់ឆ្ងាយដាច់ស្រយាល បានធ្វើឱ្យអ្នកគ្រូរូបនេះកត់សម្គាល់ឃើញពីការបោះបង់ការសិក្សា ខណៈដែលសិស្សភាគច្រើនរៀនមិនចប់ថ្នាក់ទី១២។

អ្នកគ្រូបានលើកឡើងថា «សិស្សពីថ្នាក់ទី ១ ដល់ថ្នាក់ទី ១០ ការសិក្សាហាក់មានចំនួនច្រើន ប៉ុន្តែពេលពួកគេឡើងដល់ថ្នាក់ទី ១១-១២ អត្រានៃការបោះបង់ការសិក្សាមានចំនួនច្រើន។ អត្រានៃការបោះបង់ការសិក្សា អាចមកពីពួកគេគិតថា ពួកគេធំពេញវ័យ មានកម្លាំងគ្រប់គ្រាន់សម្រាប់ធ្វើការងារ ដើម្បីរកប្រាក់ផ្គត់ផ្គង់គ្រួសារ»។

យ៉ាងណាមិញ ចំពោះសិស្សមួយចំនួនដែលអាចបន្តការសិក្សាដល់ថ្នាក់ទី១២ វិញ បើទោះបីជាមិនមានចំនួនច្រើន ប៉ុន្តែអ្នកគ្រូមើលឃើញថាពួកគេម្នាក់ៗសុទ្ធតែមានឆន្ទៈនិងគោលដៅនៅពេលអនាគត។

ជាចុងក្រោយ ក្នុងនាមជាគ្រូបង្រៀនមួយរូប អ្នកគ្រូ លីន ស្រីលាប ចង់ឱ្យសិស្សមានអនាគតល្អ ប្រឡងជាប់ទី ១២ ដើម្បីឈានទៅសម្រេចបំណងនិងគោលដៅអ្វីដែលពួកគេស្រលាញ់គ្រប់ៗគ្នា៕