ជំនួបដ៏កក្រើក! ភ្នំពេញក្រោន ប៉ះ វិសាខា ដណ្តើមពានស៊ុបភើខាប់ថ្ងៃអាទិត្យនេះ

ជំនួបដ៏​គួរ​ឲ្យ​ចាប់​អារម្មណ៍​​ដណ្តើម​ពានរង្វាន់​ខេមបូឌានស៊ុបភើខាប់ ​រវាង​ក្រុម​ជើង​ឯក​ខេមបូឌានព្រីមៀរលីគ ភ្នំពេញ​ក្រោន និង​ វិសាខា ម្ចាស់​ជើង​ឯក​ពាន​រង្វាន់​សម្តេច​តេជោ ហ៊ុន សែន វេលា​ម៉ោង​៦​ល្ងាច ថ្ងៃអាទិត្យ ទី៣០​ ខែកក្ដដា ឆ្នាំ២០២៣ នៅពហុកីឡដ្ឋានជាតិអូឡាំពិក។

ក្លិប​ភ្នំពេញក្រាន និងវិសាខា សុទ្ធតែតៀមខ្លួនបានល្អ​ដូច​គ្នា​សម្រាប់​​ត្រៀម​រដូវ​កាល​ថ្មី។ ម្ចាស់​ជើង​ឯក​ខេមបូឌានព្រីមៀរ​លីគ​បាន​ចេញ​ទៅ​ប្រកួត​មិត្តភាព​អន្តរជាតិ​នៅ​ប្រទេស​ឥណ្ឌូណេស៊ី និង​ថៃ ខណៈ​វិសាខា ក៏​បាន​ចេញ​ទៅ​កម្តៅ​សាច់​ដុំ​នៅ​ថៃ​ដែរ។

សម្រាប់​ការ​ត្រៀម​រដូវ​កាល​ថ្មី ភ្នំពេញ​ក្រោន​មិន​មាន​ការ​ផ្លាស់​ប្តូរ​សមាជិក​គួរ​ឲ្យ​កត់​សំគាល់​ទេ ដោយសារ​ក្រុម​ទាំង​មូល​ល្អ​តាំង​ពី​រដូវមុន និង​ទើប​តែ​បាន​ឈ្នះ​ជើង​ឯក ខេមបូឌានលីគ​ខាប់​កាល​ពី​ខែ​មុន។ ពីរ​ឆ្នាំ​ចុង​ក្រោយ​នេះ​ ភ្នំពេញ​ក្រោម​ឈ្នះ​ពាន​រង្វាន់​ចំនួន​៥​គឺ​ខេមបូឌានព្រីមៀរលីគ២​ ខេមបូឌានលីគ​ខាប់​២ និង​ខេមបូឌានស៊ុបភើខាប់១ ដូច្នេះ​ប្រសិន​បើ​​ថ្ងៃ​អាទិត្យ​នេះ​ឈ្នះ​​ទៀត​មាន​ន័យ​ថា ក្លិប​នេះ​ប្រមូល​​ពាន​រង្វាន់​ស្ទើរ​ទាំង​អស់ លើក​​លែង​តែ​ពាន​រង្វាន់​សម្តេចតេជោ ហ៊ុន សែន។

ចំពោះវិសាខា​បាន​ធ្វើ​ការ​ផ្លាស់​ប្តូរ​កីឡាករ​​គួរ​ឲ្យ​កត់​សំគាល់​ក្នុង​នោះ​បញ្ចេញ​កីឡាករ​ខ្លះ​ឲ្យ​ខ្ចី​ជើង​ទៅ​​ក្រុម​ខេត្ត​ព្រៃវែង និងបាន​ចែក​ផ្លូវ​​ជា​មួយ​កីឡាករ Macos Vinicius និង Emmanuel Mbarga ដោយ​នាំ​ចូល​​​ខ្សែ​ប្រយុទ្ធ​ថ្មីសញ្ជាតិ​​ប្រេស៊ីល De Liveira Bastos Jonata និង​ខ្សែ​បម្រើ​ប្រយុទ្ធ​ប្រេស៊ីល Jorge Eduardo Pedro Junior។ វិសាខា​បាន​ឈ្នះ​ពាន​រង្វាន់​សម្តេចតេជោ ហ៊ុន សែន ៣​រដូវ​កាល​ជាប់​គ្នា។

ភ្នំពេញក្រោន បាន​នាំ​ចូល​ខ្សែការពារ​ Seo Moe Kyaw សញ្ជាតិមីយ៉ាន់ម៉ា ​ដើម្បី​ពង្រឹង​តំបន់​ការពារ​ឲ្យ​កាន់​តែ​រឹង​មាំ ខណៈ​វិសាខា​ពង្រឹង​តំបន់​ប្រយុទ្ធ​ដោយ​នាំ​ចូលខ្សែ​បម្រើ​ប្រយុទ្ធ Mouzinho Lima សញ្ជាតិ​ទីម័រខាង​កើត​ដែលកំពុង​តែ​ល្អ។

ក្លិប​ទាំង​ពីរ​មាន​ប្រវត្តិ​ជួប​គ្នា​​១៨​លើក​​គិត​ចាប់​តាំងពីឆ្នាំ​២០១៨ ទាំង​ក្នុង​លីគ និង​ពាន​រង្វាន់​ផ្សេងៗ។ ក្នុង​ការ​ជួប​គ្នា​ទាំង​នោះ​ ភ្នំពេញ​ក្រោន​បាន​​ឈ្នះ៤លើក ស៊ុតបញ្ចូលទី​បាន​២៩គ្រាប់ ស្រប​ពេល​ វិសាខា ឈ្នះ៥លើក ស៊ុតបញ្ចូលទី​៣១គ្រាប់ និងស្មើគ្នា៩លើក។

ការ​ជួប​គ្នា​ក្នុង​​​ពាន​រង្វាន់​​បើក​រដូវ​កាល ភ្នំពេញ​ក្រោន​ បាន​ឈ្នះ​វិសាខា ដោយ​លទ្ធផល ២-១ វគ្គ​ផ្តាច់​ព្រ័ត្រ​ពាន​រង្វាន់​ខេមបូឌានលីគខាប់ ឆ្នាំ​២០២២​ និង​ជួប​គ្នា​ក្នុង​ពាន​រង្វាន់ខេមបូឌានស៊ុបភើខាប់ ​ឆ្នាំ២០២២ ភ្នំពេញ​ក្រោន​បាន​យក​ឈ្នះ​វិសាខា ២-១ ទៀត​ ដូច្នេះវិសាខាមិនដែល​ឈ្នះ​ភ្នំពេញ​ក្រោន​​ឡើយ​ក្នុង​ពាន​រង្វាន់​បើក​រដូវ​កាល។

ជឿ​ជាក់​ថា អ្នក​គាំទ្រ​របស់​ក្លិប​ទាំង​ពីរ​នឹង​ចូល​ទស្សនា និង​លើក​ទឹក​ចិត្ត​ច្រើន​ដល់​ក្រុម​សំណព្វ​ចិត្ត​ទាំង​ពីរ​នា​ល្ងាច​ថ្ងៃ​អាទិត្យ ទី​៣០ ខែ​កក្កដា នៅ​ពហុកីឡដ្ឋាន​ជាតិ​អូឡាំពិក​ដែល​ជា​ទឹក​ដី​កណ្តាល៕

អត្ថបទ៖ ផា រតនា​