លោក Joko Widodo ថា ឆ្នាំក្រោយ ឥណ្ឌូណេស៊ី នឹងប្រារព្ធទិវាឯករាជ្យ នៅក្នុងរដ្ឋធានីថ្មី

ថ្លែងទៅកាន់អ្នកសារព័ត៌មានកាលពីថ្ងៃព្រហស្បតិ៍ ប្រធានាធិបតីឥណ្ឌូណេស៊ី លោក Joko Widodo បានបង្ហាញសុទិដ្ឋិនិយមថា ប្រទេសរបស់លោកអាចនឹងប្រារព្ធទិវាឯករាជ្យជាតិ នាថ្ងៃទី១៧ ខែសីហា ឆ្នាំក្រោយ នៅក្នុងរដ្ឋធានីថ្មីដែលមានឈ្មោះថា Nusantara ។

ជាក់ស្ដែងនៅក្នុងពិធីអបអរសាទរទិវាឯករាជ្យជាតិ ១៧ សីហា ២០២៣ រដ្ឋាភិបាលឥណ្ឌូណេស៊ីក៏បានបញ្ចេញវីដេអូដែលបង្ហាញពីដំណើរការសាងសង់រដ្ឋធានីថ្មីនៅចំពោះមុខភ្ញៀវកិត្តិយសដែលអញ្ជើញចូលរួមប្រហែល ៨,០០០ នាក់ផងដែរ ។

រដ្ឋាភិបាលឥណ្ឌូណេស៊ីគ្រោងនឹងចាប់ផ្តើមផ្លាស់ប្តូរទីតាំងរដ្ឋធានីថ្មី ចាប់ពីថ្ងៃទី១៧ ខែសីហា ឆ្នាំ ២០២៤ ពោលចំថ្ងៃឯករាជ្យរបស់ប្រទេសតែម្ដង បន្ទាប់រដ្ឋធានីថ្មីនេះបង្ហើបខ្ទង់ចំណាយអស់ប្រហែល ៣០ ពាន់លានដុល្លារ ។

ទន្ទឹមនោះ ក្រុមហ៊ុនសរុបចំនួន ១២១ មកពី ១៨ ប្រទេសបានបង្ហាញពីចំណាប់អារម្មណ៍ក្នុងការវិនិយោគលើគម្រោងហេដ្ឋារចនាសម្ព័ន្ធនៅក្នុងរដ្ឋធានីថ្មីនេះផងដែរ ខណៈក្រុមហ៊ុនជប៉ុនមានចំនួន ២៧ ក្នុងចំណោមក្រុមហ៊ុនវិនិយោគទាំងនោះ ។

គួរបញ្ជាក់ថា បច្ចុប្បន្ន ដំណើរការសាងសង់ទីក្រុងថ្មីរបស់ឥណ្ឌូណេស៊ី កំពុងប្រព្រឹត្តទៅនៅទីតាំងមួយកន្លែងលើកោះ Kalimantan ដែលមានចម្ងាយប្រហែល ២,០០០ គីឡូម៉ែត្រពីទីក្រុងហ្សាការតា បន្ទាប់ពីទីក្រុងមួយនេះប្រឈមនឹងការកកស្ទះចរាចរណ៍ និងការបំពុលបរិយាកាសអស់រយៈពេលជាច្រើនឆ្នាំ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ខេត្តឈៀងម៉ៃ ជួបគ្រោះរញ្ជួយដីកម្រិត ៣.៣ រ៉ិចទ័រ