ឃាត់ខ្លួនបុរសម្នាក់បន្ទាប់ពីរកឃើញអាវុធAKមួយដើមក្នុងរថយន្ដ

កម្លាំងនគរបាលនៃអធិការដ្ឋាននគរបាលខណ្ឌដូនពេញ បានធ្វើការឃាត់ខ្លួនបុរសម្នាក់ក្រោយឆែករកឃើញអាវុធ​AKមួយដើមនៅក្នុងរថយន្ដ ក្នុងប្រតិបត្តិការត្រួតពិនិត្យអាវុធជាតិផ្ទុះនៅផ្លូវព្រះស៊ីសុវត្ថិ ភូមិ២ សង្កាត់ចតុមុខ កាលពីយប់ថ្ងៃទី២១ ខែសីហា ឆ្នាំ២០២៣។

ជនសង្ស័យដែលឃាត់ខ្លួនមានឈ្មោះ រុន សុវណ្ណវុត្ថា អាយុ២៤ឆ្នាំ ជនជាតិខ្មែរ មុខរបរនៅផ្ទះ ស្នាក់នៅផ្ទះលេខ៦៨G ផ្លូវលំ ភូមិក្បាលដំរី សង្កាត់កាកាប ខណ្ឌពោធិ៍សែនជ័យ។ បើករថយន្តម៉ាក TOYOTA ព្រូស ស៊េរីឆ្នាំ2010 ពណ៌ទឹកមាស ពាក់ស្លាកលេខភ្នំពេញ2BM-9691។

ក្នុងប្រតិបត្តិការចុះអនុវត្តត្រួតពិនិត្យអាវុធជាតិផ្ទុះនេះ កម្លាំងនៃអធិការដ្ឋាននគរបាលខណ្ឌដូនពេញបានឆែករកឃើញអាវុធម៉ាកAK47 លេខ16193934 ស្វាយបត់ ផលិតនៅប្រទេសចិន បង់១គ្មានគ្រាប់ ដែលជនសង្ស័យលាក់ទុកក្នុងរថយន្ដ។

ជនសង្ស័យរួមទាំងវត្ថុតាង ត្រូវបានបញ្ជូនមកកាន់អធិការដ្ឋានខណ្ឌដូនពេញដើម្បីសួរនាំ និងចាត់ការបន្តតាមនីតិវិធី៕

អត្ថបទ៖ សុខុម