សញ្ញាព្រមានមួយចំនួន ដែលម្ចាស់រថយន្ត Prius គួរដឹង

រថយន្តមួយទឹកមាននៅមានទីផ្សារខ្លាំងនៅឡើយនៅកម្ពុជា ពិសេសរថយន្តម៉ាក Prius ដែលគេនិយមជិះច្រើនបំផុត ពិសេសក្នុងក្រុងភ្នំពេញ​តែម្តង ក៏ព្រោះតែវាល្បីខាងសន្សំសំចៃសាំង ចំណាយលលើពន្ធផ្លូវប្រចាំឆ្នាំតិច និងមានតម្លៃធូរជាងរថយន្តថ្មីពីក្រុមហ៊ុន។ ចំពោះរថយន្តមួយទឹក ​អាចទិញប៉ះម៉ាស៊ីនដែលនៅល្អ ឬម៉ាស៊ីនរាង​អន់ ជារឿងពិបាក​ជៀស​ផុត។ នេះបើតាមការឱ្យដឹងពី លោក សុផេង ម្ចាស់ការ៉ាស់រថយន្តមួយទឹកមួយកន្លែង។

បើនិយាយពាក់ព័ន្ធនឹងបញ្ហាមួយចំនួន ដែលអាចបំភ័យអ្នកបើកបររថយន្តម៉ាកនេះពេលធ្វើដំណើរ លោក សុភ័ក្រ អ្នកជួសជុលរថយន្តបម្រើការនៅការ៉ាស់មួយកន្លែង បានចែករំលែកករណី ៣ ដែលលោកធ្លាប់បានដោះស្រាយជូនអតិថិជនកន្លងមកផងដែរ។

១. ជិះសុខៗស្រាប់តែលោតសញ្ញា ABS គួរបន្តដំណើរ ឬឱ្យគេត្រួតពិនិត្យ?
បើសិនជាសុខៗ ឡានអ្នកស្រាប់តែលោតសញ្ញា ABS នោះបានន័យថាវាអាចមានបញ្ហាលើស្បែកហ្វ្រាំង តែមិនបារម្ភខ្លាំង ពេកទេ បើសិនជាក្នុងករណីហ្វ្រាំងនៅជាន់ទៅស៊ី វាអាចនឹងបណ្តាលមកពីស្បែកហ្វ្រាំងគៀបមិនស្មើគ្នា។ ដំណោះស្រាយល្អបំផុតគឺចូលកន្លែងជួសជុល ហើយបើសិនជាត្រូវប្តូរស្បែកហ្វ្រាំងក៏មិនជាអស់ថ្លៃប៉ុន្មានដែរ តម្លៃអាចក្រោម ២០ដុល្លារ។

២. រលត់អេក្រង់លើតាប ហើយចុចពន្លត់ម៉ាសុីន អត់រលត់
ចំពោះរថយន្ត Prius អាចមានករណីបែបនេះកើតឡើង តែកុំបារម្ភ បញ្ហានេះ ច្រើនបណ្តាលមកពីកុងទ័រ តែក៏មិនកើត មានញឹកញាប់ដែរ ឯចំណាយលើការជួសជុល ក៏មិនជាថ្លៃប៉ុន្មានដែរ ប៉ុន្តែត្រូវប្រាកដថា កន្លែងដែលលោកអ្នកទៅផ្តល់ សេវាជួសជុលនោះ មានការធានាលើការឆ្លងភ្លើងពីកន្លែងជួសជុល ព្រោះបើសិនជាការ៉ាសនោះ ធ្វើមិនបានល្អ ក្រោយជួសជុលហើយ អាចនឹងជួបបញ្ហាមួយទៀត គឺឆ្លងភ្លើងអាគុយដេរ។

៣. ឡានលោតសញ្ញាច្រើន ក្នុងពេលតែមួយ អាចបង្កគ្រោះថ្នាក់ពេលបើកបរឬអត់?
បើសិនជាពេលដែលលោកអ្នកចុចបញ្ឆេះឡាន ហើយស្រាប់តែលោតសញ្ញាច្រើនក្នុងពេលតែមួយ វាអាចជាសញ្ញានៃការ ខូចអាគុយ ឬអាគុយដេ។ ហើយបើសិនជាជួសជុល តម្លៃអាចជាថ្លៃបន្តិច ទៅតាមស្ថានភាពជាក់ស្តែង។

ក្រៅពីបញ្ហាខាងលើនេះ លោកក៏បានប្រាប់រឿងដែលគួរឱ្យកត់សម្គាល់មួយទៀត ជាទូទៅបញ្ហាដែលច្រើនកើតមានញឹកញាប់បំផុតសម្រាប់រថយន្តម៉ាកនេះ គឺបញ្ហាខូចបូមទឹក។

លោកបន្ថែមថា មិនចំពោះតែរថយន្តម៉ាកនេះទេ ម៉ាកផ្សេងក៏អាចជួបស្ថានភាពស្រដៀងគ្នាដែរ ដូចនេះម្ចាស់រថយន្តគួរស្វែងយល់រឿងខ្លះៗពីរថយន្ត ដើម្បីដឹងពីស្ថានភាពព្រមានគ្រោះថ្នាក់ពេលធ្វើដំណើរ និងមិនងាយចាញ់បោកគេ ដោយសារកន្លែងជួសជុលខ្លះ ចេះតែទាមទារម្ចាស់រថយន្តដូរនេះដូរនោះទាំងមិនចាំបាច់៕