សម្រាប់អ្នកប្រកបរបររកចំណូលផ្ទាល់ខ្លួន អាយុចាប់ពី ៦០ឆ្នាំឡើង មិនអាចស្នើធ្វើប័ណ្ណ ប.ស.ស បានទេ

អាជីវករ អ្នកប្រកបរបររត់ម៉ូតូឌុប រត់កង់បី និងអ្នកដែលរកចំណូលផ្ទាល់ខ្លួនពីរបរផ្សេងៗ សុទ្ធតែអាចស្នើសុំធ្វើប័ណ្ណ ប.ស.ស ប៉ុន្តែលក្ខខណ្ឌ មិនអាចលើសអាយុ ៦០ឆ្នាំឡើយ។ ការស្នើធ្វើប័ណ្ណនេះ គឺតាមរយៈរបបភាគទានដោយស្ម័គ្រចិត្ត ដោយក្នុងមួយខែ បងប្អូនអាជីវករ អ្នករត់កងបី និងម៉ូតូឌុប ចំណាយត្រឹមតែ ១៥,៦០០រៀល (៤ដុល្លារ) ប៉ុណ្ណោះ។ នេះបើតាមបេឡាជាតិសន្តិសុខសង្គម បានប្រកាសកាលពីពេលថ្មីៗកន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដើម្បីអាចទទួលបានប័ណ្ណបេឡាសន្តិសុខសង្គមនេះ អាជីវករ អ្នកប្រកបរបររត់ម៉ូតូឌុប រត់កង់បី និងអ្នកដែលរកចំណូល ផ្ទាល់ខ្លួនផ្សេងៗ ត្រូវអនុវត្តទៅតាមលក្ខខណ្ឌមួយចំនួន ដែលរួមមាន ៖
– មានមុខរបរមានប្រាក់ចំណូលផ្ទាល់ខ្លួន មិនពាក់ព័ន្ធនឹងប្រាក់ឈ្នួល។
– ធ្វើការងារ ឬប្រកបរបរអាជីវកម្មផ្ទាល់ខ្លួន ដោយមិនប្រើប្រាស់បុគ្គលិក។
– ត្រូវមានអាយុមិនលើសពី៦០ឆ្នាំ គិតត្រឹមកាលបរិច្ឆេទស្នើចុះបញ្ជីនៅ ប.ស.ស។
– សាម៉ីខ្លួន ត្រូវមកស្នើសុំធ្វើប័ណ្ណ ប.ស.ស ដោយផ្ទាល់ និងភ្ជាប់ជាមួយនូវអត្តសញ្ញាណប័ណ្ណសញ្ជាតិខ្មែរច្បាប់ដើម (មានសុពលភាព)។

ដូច្នេះសម្រាប់អ្នកដែលមានបំណងចង់ធ្វើប័ណ្ណនេះ អាចធ្វើការសាកសួរព័ត៌មានបន្ថែមនៅទីស្នាក់ការ ប.ស.ស នៅទូទាំងប្រទេស ឬអាចទំនាក់ទំនងទៅកាន់លេខ ១២៨៦ ឬក៏តាមរយៈប្រព័ន្ធផ្សព្វផ្សាយបណ្ដាញសង្គម របស់បេឡាជាតិសន្តិសុខសង្គម។

គួររម្លឹកថា សមាជិកនៃ (ប.ស.ស) នឹងទទួលបាននូវផលប្រយោជន៍ធំៗដូចជា សោធនជរាភាពនៅពេលចូលនិវត្តន៍ ឬសោធនទុព្វលភាព នៅពេលធ្លាក់ខ្លួនមានជំងឺ ឬគ្រោះថ្នាក់រហូតដល់បាត់បង់សមត្ថភាពការងារ ឬសោធនឧត្តរជីវី នៅពេលសោធនិកទទួលមរណភាព ការថែទាំសុខភាព ហានិភ័យការងារ និង និកម្មភាពការងារជាដើម៕

អត្ថបទ៖ សុធាវី